Curtametraxe ambientada na novela Querido Tomás, do escritor Xosé Neira Vilas. Ambientada a finais dos anos 60, conta a historia dunha mestra que imparte clases na escola unitaria dunha aldea galega. Filla de mestre republicano, experimenta desde esta beira do océano o drama da emigración. Sara é unha "viúva de vivos" que vive ancorada na lembranza dun tempo e dun amor de xuventude. Tan só na escola atopa o bálsamo para soportalo. A denuncia do escritor Xosé Neira Vilas queda clara no cartel que antecede a película: "Galicia é coma un país de cría onde a xente nace, medra e despois... abur, lisca".