Obra - Mar Caldas - Péndulo
Péndulo (2001-2002)
Mar Caldas
Videoinstalación, 2 canles de vídeo (minidv), branco e negro, sen son, 7 min e 52 s cada vídeo
Obra exhibida en dous monitores planos encaixados na parede, ocultando o aparello de reprodución, de tal xeito que ambas as imaxes semellan xanelas abertas no muro, con idéntica altura e cunha pequena separación entre elas. O espectador pode aprehender simultaneamente as dúas imaxes desde unha distancia de visualización normal. A maior distancia semellan imaxes estáticas, xa que cada vídeo amosa un ollo, en primeirísimo plano, no que o único movemento é o incesante desprazamento lateral do iris. Situados en correspondencia coa posición do espectador, coma se fosen espellos -no monitor esquerdo o ollo esquerdo e á inversa- inducen a seguir o movemento dos ollos, acadándose un estado hipnótico. A saturación do sistema perceptivo intensifícase polo emprego doutros recursos coma a asimetría e a asincronización entre ambas as imaxes. O vídeo gravouse con luz infravermella, que deu como resultado unha imaxe onírica, en certo grao, que contrarresta co aspecto científico xerado pola fragmentación e a ampliación extrema da imaxe ocular.
|
Os contidos da sección Creadoras son responsabilidade exclusiva das súas autoras
