Vídeo monocanle, sen son, 4 min, 40 s

Ao longo de varios meses, a diferentes horas do día, a autora fotografou desde a súa xanela a fachada lateral de La Casita de Elena, un coñecido prostíbulo de Vigo. Negando a posición voyeurística, a cámara respecta a distancia visual, urbanisticamente existente, entre esa casa e a súa, sen penetrar no espazo íntimo, tan só recollendo os xogos de cor e o movemento de xanelas, cortinas..., produto da actividade doméstica, banal e cotiá que se desenvolve durante o día. As fotografías, encadeadas, conforman un híbrido entre a imaxe estática e a imaxe móbil. A firmeza do punto de vista e o silencio dan lugar a unha peza videográfica que xera un espazo contemplativo, moi propio do cadro pictórico.