Directora de cinema e docente, desenvolve a súa carreira entre Galicia e Venezuela. Preside a asociación Reencanto Produccións e é fundadora do Festival Primavera do Cine en Vigo, que leva desenvolvidas tres edicións desde 2013. A súa primeira obra é unha docuficción de 17 minutos titulada Interior, filmada na Arxentina en 2007. En 2008 entrou a traballar en Venezolana de Televisión, canle para a que realizou numerosas reportaxes de investigación. En xuño de 2009 rodou, durante o golpe de estado en Honduras, o documental Eramos invisibles, unha longametraxe que recibiu o gran premio do Festival Santiago Álvarez In Memoriam de La Habana, así como o premio á mellor dirección. Os seus últimos traballos documentais son No Justice, No Peace. Baltimore 2015, codirixido con Eric Splinter, e Frontera de paz, codirixido con Eduardo Viloria. A comezos de 2016 está a rematar a segunda parte do documental filmado en Baltimore en 2015.