Desde a Deputación de Pontevedra seguimos pendentes da publicación da normativa por parte do Goberno do Estado e da comunidade autónoma, así como de instrucións internas da entidade provincial que regulen o reinicio dos itinerarios formativos co fin de determinar unha data para o comezo das referidas actividades.

O estado de alarma continúa vixente e desde o Goberno da nación iniciouse o proceso de desescalada, que consta de 4 fases. Na segunda fase está previsto que se poidan reabrir os centros de formación, pero neste momento non está regulado como será a reapertura nin as medidas de seguridade, protección e prevención sanitaria que se deben adoptar.

En todo caso, cando se poida restablecer a actividade formativa do proxecto "Labora 2020" comunicarase o reinicio coa antelación suficiente e tomaranse e cumpriranse todas as medidas que se publiquen para tal fin en materia de seguridade, protección e prevención sanitaria.

O equipo do proxecto "Labora 2020" está dispoñible a través do correo electrónico labora2020@depo.es para resolver calquera dúbida que teñas en relación co proxecto. Escribe a túa dúbida e resolverémoscha o antes posible.

Segundo o establecido na cláusula segunda da Resolución presidencial, do 12 de marzo de 2020, quedan suspendidas as accións formativas programadas do proxecto "Labora 2020". Na mencionada resolución non se establece prazo, polo que iremos informando da data na que se retoma a normalidade.

Os itinerarios que se detallan a continuación e iniciados en marzo xa están pechados e chamouse a todas as persoas seleccionadas.

Nos itinerarios que tiñan data de inicio a partir do 16 de marzo o proceso de selección atópase na seguinte situación:

• Solicitando a formación correspondente no portal da Consellería de Economía, Emprego e Industria (http://emprego.xunta.gal) coas túas claves de acceso

• Debido á suspensión con carácter xeral que se produciu en todas as áreas de atención ao público da Deputación de Pontevedra a preinscrición, segundo o modelo establecido no anexo I "Solicitude de participación", está só dispoñible na sede electrónica da Deputación de Pontevedra (https://sede.depo.gal)

Para a presentación das solicitudes a sede electrónica da Deputación de Pontevedra admite os certificados electrónicos do sistema Cl@ve, que contempla a utilización de sistemas de identificación baseados en claves concertadas (sistemas de usuario e contrasinal) e certificados electrónicos (incluído o DNIe)

As solicitudes de preinscrición poderán presentarse en calquera momento tendo en conta que todos os prazos están interrompidos. O cómputo dos prazos renovarase no momento no que perda vixencia o estado de alarma ou, no seu caso, as prórrogas deste, segundo establece a disposición adicional terceira do R. d. 463/2020, publicado no BOE do 14 de marzo de 2020, polo que se declara o estado de alarma para a xestión da situación da crise sanitaria.

Se estás a facer un curso do proxecto "Labora 2020" a túa demanda de emprego estará en suspensión desde o día de inicio da formación do certificado, polo que non tes que selala. Ademais, entre as medidas urxentes que aprobou o Servizo Público de Emprego de Galicia (SPEG) en coordinación co Servizo Público de Emprego (SEPE) está que non será necesario selar a demanda de emprego ata o 30 de abril: https://emprego.xunta.gal/portal/gl/10-demandantes/demandantes-gl/484-medidas-urxentes-covid-19-en-materia-de-emprego.html

É un proxecto da Deputación de Pontevedra, cofinanciado nun 80 % polo Fondo Social Europeo (FSE), dirixido a 855 persoas desempregadas inscritas como demandantes de emprego da provincia de Pontevedra para a mellora da súa formación e empregabilidade a través de itinerarios personalizados.

Participar en itinerarios integrados de inserción sociolaboral que incluirán:

• Orientación laboral e titorías individuais
• Formación específica para a obtención de certificados de profesionalidade ou acreditación de competencias clave nivel 2
• Práctica profesional titorizada correspondente a formación específica en contornos reais de traballo
• Formación transversal en igualdade de oportunidades, igualdade de trato, non discriminación e loita contra a exclusión social; desenvolvemento sostible, respecto e coidado do medio
• Formación complementaria: procura de emprego, fomento do emprendemento e autoemprego

Ás persoas desempregadas que pertenzan a colectivos vulnerables, indicados como tal na convocatoria de 2018 de axudas do Fondo Social Europeo (FSE), previstas no Programa Operativo de Emprego, Formación e Educación (POEFE), destinadas a entidades locais para a inserción das persoas máis vulnerables (AP-POEFE):

• Persoas desempregadas de longa duración (PDL)
• Mozas e mozos menores de 30 anos non atendidos no Programa Operativo de Emprego Xuvenil (POEX)
• Persoas maiores de 55 anos
• Persoas con certificado de discapacidade
• Persoas inmigrantes
• Minorías étnicas e comunidades marxinadas
• Outros colectivos desfavorecidos: persoas que viven en fogares compostos por unha única persoa adulta con fillas ou fillos ao seu cargo; persoas sen fogar ou afectadas pola exclusión en materia de vivenda; vítimas de violencia de xénero, vítimas de discriminación por orixe racial ou étnica, orientación sexual e identidade de xénero; solicitantes de asilo; persoas con problemas de adicción; persoas reclusas e exreclusas; persoas perceptoras de rendas mínimas ou salarios sociais; persoas con fracaso ou abandono escolar
• Outras persoas en situación de vulnerabilidade acreditada por un informe dos servizos sociais

• Solicitando a formación correspondente na túa oficina do Servizo Público de Emprego (SPEG) ou no portal da Consellería de Economía, Emprego e Industria (http://emprego.xunta.gal) coas túas claves de acceso
• Realizando a preinscrición, segundo o modelo establecido no anexo I "Solicitude de participación", que estará dispoñible na sede electrónica da Deputación de Pontevedra (https://sede.depo.gal) e que se presentará preferentemente por vía electrónica
  • Para a presentación das solicitudes a sede electrónica da Deputación de Pontevedra admite os certificados electrónicos do sistema Cl@ve, que contempla a utilización de sistemas de identificación baseados en claves concertadas (sistemas de usuario e contrasinal) e certificados electrónicos (incluído o DNIe)
  • Opcionalmente, aquelas persoas solicitantes non obrigadas á presentación electrónica poderán preinscribirse de forma presencial, descargando o formulario dispoñible na sede electrónica, en calquera dos lugares e rexistros establecidos na normativa reguladora do procedemento administrativo común

O proxecto Labora 2020 conta cunha axuda económica para as persoas formadas que cubre os gastos de asistencia á formación, transporte, manutención, aloxamento e conciliación co coidado de familiares. Este importe é de 13,45 € (por persoa e día de asistencia) e aboarase logo de comprobar a asistencia á formación.

Esta axuda está condicionada á asistencia. As ausencias non poderán superar o 10 % do total da acción formativa; no caso de superar esa porcentaxe deberase devolver todo o importe percibido.

As axudas percibidas por prestacións sociais públicas ou de asistencia social serán compatibles coa axuda económica. Este requisito comprobarase ao inicio da acción formativa.

Terás dereito á axuda económica dependendo da contía da prestación ou subsidio que esteas a percibir.

Terás dereito a recibir a axuda económica se careces de rendas ou ingresos de calquera natureza, iguais ou superiores en cómputo mensual ao 75 % do Indicador Público de Rendas de Efectos Múltiples (IPREM).

Para realizar a formación en Competencias Clave non é necesario cumprir ningún requisito formativo/educativo.

O resto dos itinerarios formativos están asociados á obtención do certificado de profesionalidade correspondente, polo que o alumnado deberá acreditar os requisitos esixidos no artigo 4 do R. d. 34/2008, de 18 de xaneiro, polo que se regulan os certificados de profesionalidade:

• Nivel 1: sen requisitos formativos nin profesionais
• Nivel 2: estar en posesión do título de graduada ou graduado en educación secundaria obrigatoria. Estar en posesión dun certificado de profesionalidade do mesmo nivel do módulo ou módulos formativos e/ou do certificado de profesionalidade ao que desexa acceder. Estar en posesión dun certificado de profesionalidade de nivel 1 da mesma familia e área profesional. Cumprir o requisito académico de acceso aos ciclos formativos de grao medio, ou ben ter superado as correspondentes probas de acceso convocadas polas administracións educativas. Ter superada a proba de acceso á universidade para maiores de 25 anos ou 45 anos. Ter o certificado de apta ou apto nas competencias necesarias para acceder aos certificados de profesionalidade de nivel 2 de cualificación correspondente.
• Nivel 3: estar en posesión do título de graduada ou graduado en educación secundaria obrigatoria. Estar en posesión dun certificado de profesionalidade do mesmo nivel do módulo ou módulos formativos e/ou do certificado de profesionalidade ao que desexa acceder. Estar en posesión dun certificado de profesionalidade de nivel 1 da mesma familia e área profesional. Cumprir o requisito académico de acceso aos ciclos formativos de grao medio, ou ben ter superado as correspondentes probas de acceso convocadas polas administracións educativas. Ter superada a proba de acceso á universidade para maiores de 25 anos ou 45 anos. Ter o certificado de apta ou apto nas competencias necesarias para acceder aos certificados de profesionalidade de nivel 2 de cualificación correspondente.

O Instituto Galego das Cualificacións da Xunta de Galicia será o que expida a acreditación do correspondente certificado de profesionalidade, sempre que se cumpran os requisitos formativos/educativos esixidos no certificado con anterioridade ao inicio da acción formativa e se superen todos os módulos correspondentes á formación específica e á realización das prácticas profesionais. A formación que se impartirá en cada un dos itinerarios do proxecto está asociada á obtención do certificado de profesionalidade correspondente ou á obtención de Competencias Clave do Nivel 2.

A asistencia é obrigatoria; as horas de ausencias non poden superar o 10 % das horas totais do itinerario.

As persoas beneficiarias que teñan faltas de asistencia superiores ao 10 % das horas totais do itinerario ou abandonen a formación deberán devolver o importe da axuda percibida.

As ausencias superiores ao 25 % das horas da formación teórica suporán a baixa na formación.

A formación transversal en igualdade, desenvolvemento sostible, busca de emprego, fomento do emprendemento e autoemprego é obrigatoria para todas as persoas participantes, xa que forma parte dos itinerarios formativos. 

As persoas beneficiarias que obteñan un contrato de traballo temporal a tempo parcial durante o período formativo non causarán baixa no itinerario sempre que poidan compatibilizar o traballo co horario do programa formativo.

O proxecto Labora 2020 é compatible con outra formación sempre que o horario o permita. Haberá que ter en conta outras incompatibilidades coma a participación en programas de formación subvencionada ou programas de políticas activas de emprego.