Máis de duascentas persoas participaron nos doce cursos de "Depo en marcha" 2019 que rematan a vindeira semana en nove concellos
Os obradoiros, que buscan favorecer o envellecemento activo, desenvolvéronse en Vigo, Pontevedra, Ponteareas, Caldas de Reis, A Estrada, Lalín, Gondomar, Sanxenxo e Soutomaior
Máis de duascentas persoas finalizarán esta próxima semana os doce novos obradoiros enmarcados no programa "Depo en marcha" 2019, organizado pola Deputación de Pontevedra para promover o envellecemento activo nos concellos da provincia. Estes obradoiros desenvolvéronse en nove municipios: Caldas de Reis, A Estrada, Sanxenxo, Vigo, Ponteareas, Soutomaior, Lalín, Pontevedra e Gondomar.
Deste xeito, o luns 25 de novembro pecharase en Pontevedra o obradoiro Cociña Galega, no que participaron 15 persoas da Asociación Cultural Veira do Río de Ponte Sampaio. Ao día seguinte clausuraranse outros dous cursos en Soutomaior e Lalín: Panadería e Repostería, que recibiu a 25 persoas da Asociación Cultural Moreira a Tope, e Ximnasia de Mantemento, ao que asistiron 16 persoas da Asociación de Mulleres en Igualdade de Moneixas.
Por outra banda, o mércores 27 de novembro pecharase en Caldas de Reis unha nova acción denominada Arte con Flores, na que participaron 15 persoas da Asociación de Xubilados e Pensionistas Caldenses. Ese mesmo día finalizarán tamén outras tres accións formativas nos concellos de Sanxenxo, Vigo e Gondomar. En Sanxenxo, 17 persoas do Club de Xubilados e Pensionistas de Portonovo realizaron o curso Tapiñas e Petiscos, mentres que en Vigo outras 16 persoas da Asociación de Veciños da Miñoca finalizarán a actividade Arte con Flores. En Gondomar, outras 15 persoas da Asociación de Veciños da Parroquia San Martiño Borreiros rematarán o obradoiro Conservando a Memoria.
O xoves 28 de novembro finalizarán a súa actividade as persoas que participaron nos cursos Pilates, en Vigo, e Tapiñas e Petiscos, na Estrada. Ao primeiro asistiron 24 persoas pertencentes á Asociación de Veciños San Pedro de Sárdoma O Carballo, e no segundo tomaron parte 15 persoas da Asocación Acrofam.
Por último, o 30 de novembro rematarán outros tres cursos en Ponteareas, Vigo e A Estrada. No primeiro caso, 15 persoas da Asociación Casa Cultural Antorcha participaron no curso Restauración de Mobles e Tapicería. En Vigo houbo tamén 15 asistentes á mesma actividade, na que tomaron parte socias e socios do Centro Cultural Artístico e Recreativo Valladares. Na Estrada, 21 persoas da Asociación de Mulleres Rurais San Xulián de Vea e Baloira fixeron o obradoiro Cociña Galega.
Os principais obxectivos do programa "Depo en marcha", promovido pola Deputación, son favorecer o envellecemento activo, optimizar as oportunidades de saúde, participación e seguridade das persoas maiores, mellorar a súa calidade de vida, establecer relacións sociais e favorecer a súa participación en actividades que melloren o seu estado anímico, así como potenciar movementos de participación e cooperación social, promover espazos de encontro e impulsar a independencia das e dos maiores para evitar o illamento e as situacións de soidade.
