Case 140 persoas participaron nos oito cursos de "Depo en marcha" 2019 que rematan esta semana en cinco concellos
Os obradoiros, que buscan favorecer o avellentamento activo, desenvolvéronse en Vigo, Pontevedra, Vilagarcía de Arousa, Mos e Redondela
Un total de 137 persoas finalizan esta semana oito obradoiros enmarcados no programa "Depo en marcha" 2019, organizado pola Deputación de Pontevedra para promover o envellecemento activo nos concellos da provincia. Estes obradoiros desenvolvéronse en cinco municipios: Pontevedra, Vilagarcía de Arousa, Mos, Redondela e Vigo.
O martes 3 de decembro rematará en Pontevedra o obradoiro Bailes de Salón, no que participaron persoas da Agrupación Comarcal de Pensionistas e Xubilados de CC. OO. de Pontevedra. O xoves rematará no mesmo concello o curso Ximnasia de Mantemento, ao que asistiron integrantes da Asociación de Veciños Heroes de Pontesampaio 1.809.
No concello de Vigo outros dous obradoiros chegan ao seu termo. Así, o xoves 5 rematará tanto o curso Elaboración de xabóns, ao que acudiron socias e socios da Asociación de Vecinos Nosa Terra de Alcabre, coma Restauración de mobles e tapicería, que contou con participantes pertencentes á Asociación de Vecinos San Roque.
No día 5 tamén rematará o obradoiro Aerodance no concello de Mos, que contou coa participación de persoas da Asociación do Centro Recreativo e Cultural de Torroso. Ademais, o xoves pecharase en Vilagarcía de Arousa o curso Ioga, impartido ás e aos integrantes da Asociación Cultural Malveiras. Un día antes, o mércores 4, chegarán ao seu final os obradoiros Informática (Iniciación), tamén en Vilagarcía de Arousa, ao que acudiron persoas da Asociación de Veciños Agustín Romero de Cornazo, e Conservas Artesanais, no concello de Redondela, ao que asistiron integrantes da Asociación de Veciños Cultural e Deportiva O Eixo.
Os principais obxectivos do programa "Depo en marcha", promovido pola Deputación, son favorecer o envellecemento activo, optimizar as oportunidades de saúde, participación e seguridade das persoas maiores, mellorar a súa calidade de vida, establecer relacións sociais e favorecer a súa participación en actividades que melloren o seu estado anímico, así como potenciar movementos de participación e cooperación social, promover espazos de encontro e impulsar a independencia das e dos maiores para evitar o illamento e as situacións de soidade.
