Preto de 70 persoas de Vigo, Moaña e Ponteareas súmanse aos obradoiros de "Depo en marcha"
Esta semana comezan catro novos cursos que permitirán ás persoas maiores da provincia asistir a obradoiros de risoterapia, musicoterapia, ximnasia de mantemento e elaboración de xabóns
Os concellos de Vigo, Moaña e Ponteareas súmanse esta próxima semana a unha nova entrega dos obradoiros do programa "Depo en marcha 2017" da Deputación de Pontevedra. Esta acción da institución provincial impartirá, ao longo deste exercicio, un total de 161 cursos para entidades de persoas maiores, xubiladas e pensionistas de 45 concellos da provincia de Pontevedra.
A partir do vindeiro 1 de setembro, Vigo acollerá dous novos cursos deste programa da institución provincial. Por un lado, 15 persoas da Asociación de Daño Cerebral de Vigo – ALENTO asistirán a un obradoiro de elaboración de xabóns que durará ata o 22 de decembro e, por outro, para 18 persoas de DOA, saúde mental, impartirase un obradoiro de musicoterapia. Este último curso estenderase ata o vindeiro 15 de decembro e con el as persoas asistentes poderán coñecer as posibilidades que ofrece a música como ferramenta de intervención lúdica, educativa e terapéutica.
Por outra banda, en Moaña, 17 persoas da Asociación Xubilados e Pensionistas Santa Eulalia de Meira participarán nun obradoiro de risoterapia a partir do mércores 30 de agosto en horario de 16:30 a 18.30 horas. O obxectivo deste curso é coñecer os beneficios da risa no ámbito da saúde e mellorar o estado anímico e físico.
Por últimos, 18 persoas da Asociación Cultural San Nicolas de Prado de Ponteareas recibirán desde o venres 1 de setembro un curso de ximnasia deportiva que se alongará ata 10 de novembro. Este obradoiro está pensando para adquirir unha maior destreza na coordinación dinámica de movementos e do equilibrio, para realizar exercicios de quecemento muscular e articular e para adquirir as destrezas necesarias para a relaxación física e psíquica.
A Deputación de Pontevedra pon en marcha este programa de fomento do envellecemento activo a través de actividades encaixadas en diversas temáticas e que conta cun orzamento de 120.000 euros. Con "Depo en marcha 2017", a institución provincial busca mellorar a calidade de vida das persoas maiores da provincia de Pontevedra, establecendo relacións sociais e favorecendo a participación en actividades que melloren o seu estado anímico, potenciando movementos de participación e cooperación social, promovendo espazos de encontro e tamén o intercambio de experiencias.
As 8 alternativas de obradoiros que se impartirán nesta ocasión son "Traballando coas mans": arte con flores, cestería, elaboración de xabóns, iniciación ao encaixe de palillos, restauración de mobles e tapicería e traballos manuais; "Entre fogóns": cociña galega, conservas artesanais, licores caseiros, panadería e repostería e tapiñas e petiscos; "Aprendendo da natureza": plantas medicinais; "Móvete": pilates, ioga, ximnasia de mantemento e zumba; "Activando corpo e mente": conservando a memoria, musicoterapia, risoterapia e control e manexo da ansiedade e o estrés; "Enredando": xogos tradicionais e teatro; "Dálle marcha": bailes de salón, pandeireta e canto popular; e, por último, "En rede": Internet, correo electrónico e manexo do móbil, informática de iniciación e Informática avanzada.
As actividades teñen lugar nun total de 45 concellos da provincia: Agolada, Arbo, Barro, Baiona, Bueu, Caldas de Reis, Cambados, Cangas, Cerdedo-Cotobade, Covelo, Cuntis, A Estrada, Forcarei, Fornelos de Montes, Gondomar, O Grove, A Guarda, A Illa de Arousa, Lalín, Marín, Meaño, Moaña, Moraña, Mondariz, Mos, Nigrán, Pazos, Poio, Ponteareas, Ponte Caldelas, Pontevedra, O Porriño, Redondela, Ribadumia, O Rosal, Salceda de Caselas, Sanxenxo, Silleda, Soutomaior, Tomiño, Tui, Valga, Vigo, Vilagarcía de Arousa e Vilanova de Arousa.
