Fornelos de Montes inaugura o sábado os obradoiros do programa "Depo en marcha 2017"
Arredor de 20 persoas beneficiaranse ata novembro dunha actividade sobre a conservación da memoria
O Concello de Fornelos de Montes inaugura este sábado 5 de agosto a temporada de obradoiros do programa "Depo en marcha 2017" da Deputación de Pontevedra, que impartirá ao longo deste exercicio un total de 161 cursos para entidades de persoas maiores, xubiladas e pensionistas de 45 concellos da provincia de Pontevedra.
As persoas beneficiarias desta primeira actividade do curso serán as pertencentes á Sociedade Cultural Recreativa de Calvos, cun total de 19 participantes no obradoiro Conservando a Memoria. Con horario de 19:00 a 21:00 horas, a actividade estenderase ata o vindeiro 11 de novembro e servirá para coñecer o funcionamento da mente na memorización, adquirir técnicas básicas para adestrar o desenvolvemento da memoria e para reflexionar sobre a relación existente entre unha dieta equilibrada e unha boa memoria.
A Deputación de Pontevedra pon en marcha este programa de fomento do envellecemento activo a través de actividades encaixadas en diversas temáticas e que conta cun orzamento de 120.000 euros. Con "Depo en marcha 2017", a institución provincial busca mellorar a calidade de vida das persoas maiores da provincia de Pontevedra establecendo relacións sociais e favorecendo a participación en actividades que melloren o seu estado anímico, potenciando movementos de participación e cooperación social, promovendo espazos de encontro e, tamén, intercambios de experiencias.
As oito alternativas dos obradoiros que se impartirán nesta ocasión serán Traballando coas Mans: arte con flores, cestería, elaboración de xabóns, iniciación ao encaixe de palillos, restauración de mobles, tapicería e traballos manuais; Entre Fogóns: cociña galega, conservas artesanais, licores caseiros, panadería, repostería, tapiñas e petiscos; Aprendendo da Natureza: plantas medicinais; Móvete: pilates, ioga, ximnasia de mantemento e zumba; Activando Corpo e Mente: conservando a memoria, musicoterapia, risoterapia e control e manexo da ansiedade e o estrés; Enredando: xogos tradicionais e teatro; Dálle Marcha: bailes de salón, pandeireta e canto popular; e, por último, En Rede: internet, correo electrónico e manexo do móbil, informática de iniciación e Informática avanzada.
As actividades terán lugar nun total de 45 concellos da provincia: Agolada, Arbo, Barro, Baiona, Bueu, Caldas de Reis, Cambados, Cangas, Cerdedo-Cotobade, Covelo, Cuntis, A Estrada, Forcarei, Fornelos de Montes, Gondomar, O Grove, A Guarda, A Illa de Arousa, Lalín, Marín, Meaño, Moaña, Moraña, Mondariz, Mos, Nigrán, Pazos de Borbén, Poio, Ponteareas, Ponte Caldelas, Pontevedra, O Porriño, Redondela, Ribadumia, O Rosal, Salceda de Caselas, Sanxenxo, Silleda, Soutomaior, Tomiño, Tui, Valga, Vigo, Vilagarcía de Arousa e Vilanova de Arousa.
