O Plan Concellos achega 21.000 € a Covelo para rehabilitar palcos da música e construír parques biosaudables
O goberno provincial entregou xa o 31% do total destinado ao municipio dentro do Plan Concellos 2016, o que supón un investimento na vila de 132.036,94 €
A Deputación de Pontevedra, mediante resolución presidencial, acordou destinar 21.000 euros ao concello de Covelo para levar a cabo a rehabilitación dos palcos de música e a instalación de parques biosaudables na parroquia de Maceira. Esta acción será enmarcada dentro do Plan Concellos 2016 do goberno provincial, e máis concretamente na liña 1 deste proxecto, dedicada a investimentos.
Esta axuda súmase ás xa outorgadas con anterioridade, que corresponden no caso da liña 3 –actividades culturais, deportivas, musicais e medioambientais– ao financiamento de varias actividades: os II Galardóns "Síntete Covelo 2016", un proxecto piloto de inserción social e prelaboral ligado ás hortas ecolóxicas, a Feira de Artesanía, Comercio e Servizos, as festas patronais de 2016, o II Concurso de Contos do Concello de Covelo, un proxecto educativo e de promoción de hábitos saudables e o ciclo deportivo "Móvete en Covelo", sumando todas elas unha dotación de 15.862,41 €. Por outra banda, a liña 4 –plans de emprego– dedicou un total de 95.174,49 € á contratación de 20 traballadores e traballadoras para realizar diversas tarefas municipais.
A Deputación de Pontevedra leva investido en Covelo un total de 132.036,94 € en 2016, o que representa o 31,2% do total destinado ao municipio dentro do Plan Concellos 2016.
