O CEIP Reibón de Moaña arranxará as súas fachadas cun investimento superior aos 50.000 euros do Plan Concellos 2017 da Deputación de Pontevedra

A institución provincial leva entregado o 45 % do total destinado a Moaña dentro do plan, cun investimento superior aos 435.000 euros

A Deputación de Pontevedra acaba de aprobar, a través dunha Resolución presidencial, unha nova achega ao Concello de Moaña dentro do Plan Concellos 2017, concretamente a través da súa liña 1 de Investimentos. Nesta ocasión, a institución provincial destina un total de 52.000 euros cos cales a localidade do Morrazo poderá facer fronte ao arranxo das fachadas do CEIP Reibón.

Ademais, anteriormente Moaña xa recibira 21.000 € para a adquisición dunha embarcación semirríxida que empregará nas labores dos seus servizos de salvamento e socorrismo a través da liña 1, 144.811,23 euros para facer fronte a gastos correntes na liña 2 e, por último, 217.210,14 euros para a contratación de 29 persoas que desempeñarán as súas funcións nos diversos servizos municipais da localidade, a través da liña 3 de Emprego do plan.

Coa suma desta nova achega, Moaña xa ten recibido da Deputación de Pontevedra o 45,1 % do total de investimento que lle corresponde dentro do Plan Concellos 2017, isto é, 435.021,37 € dun total de máis de 965.000 €. Esta cantidade representa, ademais, un incremento do 5 % respecto ao que recibiu no exercicio anterior.