Máis de 250 pontevedresas rematan esta semana accións formativas de "Conectadas"
Os obradoiros de igualdade da Deputación que rematan esta semana desenvolvéronse en 14 concellos da provincia
O programa da Deputación de Pontevedra "Conectadas" 2019 leva desde finais do mes de agosto poñendo en marcha accións formativas dirixidas a apoderar as mulleres da provincia mediante a formación. Durante esta primeira semana de decembro poñerase fin a un total de quince obradoiros que se realizaron nos concellos de Cangas, A Estrada, A Guarda, Mos, Sanxenxo, Soutomaior, Dozón, O Grove, A Lama, Rodeiro, Valga, Pontevedra, Silleda e Vilagarcía de Arousa.
Este luns 2 de decembro finalizan un total de cinco cursos. No concello de Cangas, mulleres da Asociación de Diagnosticad@s de Cancro de Mama finalizarán un curso de Teatro; na Estrada, veciñas pertencentes á Asociación de Mulleres Rurales Santo Montillon rematarán un curso de Pilates; e integrantes da Asociación Española Contra el Cáncer de Mos clausurarán o obradoiro de Taichí no que participaban. O mesmo día, veciñas da Casa Santa María de la Esperanza Esclavas de la Virgen Dolorosa de Mos e da Asociación de Mulleres Rurais Consumidoras e Culturais Santa Tecla da Guarda clausurarán candanseu obradoiro de Risoterapia.
O martes 3, varias integrantes da Asociación de Veciños San Xoán de Dorrón finalizarán o curso Horta Ecolóxica en Sanxenxo. No concello de Soutomaior veciñas da Asociación e Mulleres Rurais Anduriña de Arcade rematarán o obradoiro Cociña e Alimentación. Hábitos Saudables.
Ao día seguinte, o mércores 4 de decembro, clausuraranse un total de cinco accións. En Dozón integrantes da Asociación Mulleres Rurais Pena de Francia finalizarán o curso de Ximnasia de Mantemento, mulleres da Cofradía de Pescadores San Martiño do Grove rematarán o obradoiro de Artesanía en Coiro e veciñas pertencentes á Asociación Cultural San Antonio da Lama poñerán fin ao obradoiro Relaxación e Manexo do Estrés: Momentos en Calma. Este mércores tamén se clausurarán os obradoiros de Xardinería, no que tomaron parte veciñas da Asociación de Mujeres Rurais Virxen do Faro de Rodeiro, e de Iniciación ao Scrapbooking, no que participaron mulleres da ASDIVALU de Valga.
Por último, o xoves 5 de decembro finalizarán os cursos de Iniciación á Costura, no que participaron veciñas da Asociación Mulleres Rurais Fervenza do Castelo de Silleda, e de Alfabetización Dixital II: Internet, correo electrónico..., no que participaron as veciñas da Asociación de Mulleres Rurais Illa de Cortegada de Vilagarcía de Arousa. Ademais, tamén rematará o Obradoiro de Mindfulness no que estaban a participar 18 mulleres da Asociación Española Contra el Cáncer de Pontevedra.
"Conectadas" 2019 é un programa provincial que pon o acento na formación, desenvolvendo cursos e obradoiros sobre distintas cuestións para apoderar as mulleres e dotalas das ferramentas necesarias para construír unha sociedade igualitaria. Ademais, esta iniciativa busca favorecer as relacións interpersoais e intercambio de experiencias e contribuír a mellorar a súa empregabilidade e o seu mantemento no mercado de traballo, así como reducir a brecha dixital. O programa está dirixido a asociacións, federacións e fundacións que traballan para a promoción e o desenvolvemento das mulleres, o apoderamento feminino e a consecución da igualdade entre mulleres e homes.
