Máis de 50 mulleres da provincia comezan esta semana accións formativas do programa "Conectadas"
Os obradoiros de igualdade da Deputación de Pontevedra serán desenvolvidos en dous concellos pontevedreses
O programa da Deputación de Pontevedra "Conectadas" 2019 continúa poñendo en marcha accións formativas dirixidas a empoderar ás mulleres da provincia mediante a formación. Deste xeito, entre o luns 11 e o domingo 17 de novembro comezan tres novas accións nas que participarán un total de 52 mulleres pertencentes a asociacións de dous concellos pontevedreses, Mondariz e Ponteareas. Ademais, outros catro cursos comezados nos meses de setembro e outubro chegan ó seu fin esta semana.
Máis polo miúdo, 17 mulleres de Ponteareas participarán na acción formativa Artesanía en Coiro, organizada pola Asociación de Vecinos La Comunidad de Pías. O curso comezará este luns, desenvolverase ata o 3 de febreiro de 2020 no Teleclub Lenguda (Pías, s/n, Ponteareas) e terá lugar, os luns de 18:00 a 21:00 horas.
En Mondariz, 20 integrantes da Asociación de Mulleres de Gargamala comezan o 15 de novembro a acción formativa Ximnasia de Mantemento, que terá lugar os venres de 20:15 a 21:45 horas na Casa Cultural de Mourelle LGR Gargamala ata o 28 de febreiro do vindeiro ano. Finalmente, o 12 de novembro dará comezo tamén en Mondariz un curso denominado Encontro con Lecturas: Animación á Lectura e Memoria, ó que acudirán un total de 15 persoas da Asociación Española Contra el Cáncer de Mondariz. Esta acción terá lugar os martes de 19:00 a 21:00 horas na Biblioteca Pública Municipal de Mondariz Xoán Xosé Pérez Labaca e rematará o 25 de febreiro.
Ademais, esta semana rematarán catro cursos cun total de 87 mulleres participantes. Deste xeito, este luns finaliza o curso Alfabetización Dixital II: Internet, Correo Electrónico, Manexo da Tableta, Teléfono Intelixente..., no que participaron 20 mulleres da Asociación Punto Delas–Secretaria das Mulleres.
Conservación de Alimentos, Conservas Artesanais, o curso impartido en Soutomaior ó que asistiron persoas da Asociación Vecinal y Cultural Pozovello, rematará o martes 12.
22 integrantes da Asociación Rede de Mulleres Veciñais Contra os Malos Tratos de Vigo rematarán o 13 de novembro a acción Socializándose Coas Redes: Facebook, Twitter, Blogs..., que deu comezo o 7 de outubro e tivo lugar os luns e mércores de 10:00 a 13:00 horas. Por último, no Grove, o curso Pilates, que comezara o 3 de setembro e que mobilizou a 25 integrantes da Asociación de Pensionistas y Jubilados de O Grove, rematará o 14 de novembro.
"Conectadas" 2019 é un programa provincial que pon o acento na formación, desenvolvendo cursos e obradoiros sobre distintas cuestións para apoderar ás mulleres e dotalas das ferramentas necesarias para construír unha sociedade igualitaria. Ademais, esta iniciativa busca favorecer as relacións interpersoais e intercambio de experiencias, contribuír a mellorar a súa empregabilidade e o seu mantemento no mercado de traballo, así como reducir a brecha dixital. Está dirixido a asociacións, federacións e fundacións que traballan para a promoción das mulleres, o seu desenvolvemento, o empoderamento feminino e a consecución da igualdade entre mulleres e homes.
