Carmela Silva visita obras do Plan Concellos na Estrada
O concello da Estrada recibiu un investimento total da Deputación de Pontevedra situado en preto de 2.200.000 €, ós que hai que engadir os 500.000 € destinados á execución do trazado e seguridade viaria na E.P. 7017 Callobre- Ponte Ledesma
A presidenta da Deputación de Pontevedra, Carmela Silva, visitou as obras da rede de abastecemento na Avenida de Vigo e Benito Vigo e a reposición de servizos na rúa Fermín Bouza Brei, da Estrada, que se puxeron en marcha ó abeiro da liña 1 do "Plan Concellos 2016". Para a realización destes acometidos, o concello da Estrada recibiu 341.217 € da institución provincial.
A presidenta provincial, Carmela Silva, salientou que "os investimentos da Deputación na Estrada falan de cómo se fai política. Cun reparto equitativo, con criterios obxectivos e fora de calquera discrecionalidade". Un investimento de preto de 2.200.000 €, ós que hai que engadir os 500.000 € da execución das melloras na estrada E.P. 7017, dos que a Presidenta salientou os 1.737.000 € do Plan Concellos, os 112.162 € destinados a mobilidade, os 109.000 € dirixidos ó fomento do emprego no concello, os 77.166 € para cultura e lingua, 35.800 € para cohesión social e xuventude, 30.000 € destinados ó fomento da igualdade entre mulleres e homes, 18.600 € a medio ambiente e 13.000 dirixidos ó deporte.
A Deputación de Pontevedra destinou á Estrada no ano 2016 preto de 2.200.000 €, isto é, un investimento de 102 € por habitante. Resalta o orzamento do "Plan Concellos 2016", que por valor de preto de 1.737.000 €, supuxo un aumento de máis de 584.383,54 € respecto ao ano anterior. A liña 1 do "Plan Concellos 2016" achegou 1.373.233 € á vila cos que se están a realizar obras e servizos como a rede de abastecemento na avenida de Vigo e de Benito Vigo, a pavimentación de vías no casco urbano, a reposición de servizos na rúa Fermín Bouza Brei e se adquiriron 150 colectores e dous camións equipados para a recollida de lixo. Tamén, e a través da liña 2, se destinaron máis de 65.100 € para actividades na vila e, mediante a liña 4 se crearon 34 postos de emprego nos servizos municipais cun investimento de 298.623 €.
Á marxe do "Plan Concellos 2016", A Estrada recibiu máis de 77.100 € para o fomento da cultura e lingua na vila, con máis de 29 actuacións do Pontegal e axudas para a dinamización lingüística, para a rehabilitación e sinalización do patrimonio histórico cultural e para actividades enmarcadas no Ano Castelao. Tamén se destinaron 35.800 € para cohesión social e xuventude, ben a través dos servizos sociais especializados, ben mediante os programas "En Ruta coa Depo", no que están a participar 18 asociacións do concello; "Depo en Marcha", con 6 asociacións inscritas; "DepoTermal", do que se están a beneficiar 84 persoas ou "Depo Aventura A Lanzada", no que participaron 44 mozas e mozos do concello.
Do mesmo xeito, A Estrada recibiu 13.000 € para o deporte federado de base e para a copa de fútbol Deputación de Pontevedra e 30.000 € para impulsar políticas de igualdade na vila a través do programa "Conectadas", no que están a participar 33 asociacións da vila.
Amais, a Deputación de Pontevedra destinou, 109.000 € para a inserción laboral e o fomento do emprego no concello da Estrada. Así, catro persoas bolseiras están a desenvolver a súa primeira experiencia laboral no propio concello e outras sete en empresas do municipio. Tamén se achegaron axudas por valor de 18.600 € para as cooperativas agrogandeiras e para o mantemento do campo de fútbol de Pardiñeiro-Berres.
O concello da Estrada tamén se beneficiou de 112.162 € para obras de sinalización horizontal en vías provinciais como A Estrada-Forcarei, Aguiones-Santa Cristina, Couso-San Miguel de Barcala, acceso ó ponte novo, Pena do Foxo-Olives, Pena – Ribela, Orosa-Orazo, Estrada-As Casetas, San Andrés de Vea-San Xulián de Vea, Codeseda-Servil e Olives-Sequeros.
