A xuventude de Marín goza da segunda xornada do "Depo RúARTE 2017"
A alameda de Marín foi escenario durante esta tarde de obradoiros de breakdance, turntablism DJ e beatbox, deseño de grafittis e personalización de gorras
A deputada de Cohesión Social e Xuventude, Digna Rivas asistiu esta tarde á segunda xornada do programa "Depo RúARTE 2017", que está a promover outra forma de ocio e cultura urbana entre a mocidade da provincia de Pontevedra.
A alameda de Marín acolleu a mozas e mozos maiores de 12 anos que participaron neste programa impulsado polo Servizo de Cohesión Social e Xuventude da institución provincial. "Depo RúARTE 2017" ten por obxectivos ofertar coma alternativa de ocio actividades de música, baile e pintura urbana.
A mocidade practicou diferentes modalidades artísticas enmarcadas en MusicARTE, UrbanARTE e CreARTE. En canto a MusicARTE ofreceuse tres obradoiros relacionados coa creación musical. O primeiro deles, breakdance, estivo centrado no ensino e aprendizaxe das técnicas deste estilo de baile urbano; o segundo, turntablism DJ vertebrou arredor do movemento que realizan os DJ de Hip-Hop cos vinilos para crear composicións sonoras; e o terceiro, o beatbox, consistiu na creación de música coa boca.
Pola súa banda, a través de UrbanARTE ofreceuse un obradoiro para a creación e elaboración de pinturas coa base dos grafitti e as mozas e mozos que asistiron a CreARTE puideron personalizar as súas gorras mediante debuxos elaborados na parte frontal.
Nesta segunda edición de "Depo RúARTE", a diferenza da anterior, todos os obradoiros agrúpanse nunha mesma xornada para facelo máis atractivo para a mocidade. Ademais, o programa ten un compoñente inclusivo para que mozas e mozos e monitoras e monitores con diversidade funcional participen de forma activa nas actividades.
Tras o seu paso por Nigrán e Marín, o programa recalará o vindeiro 1 de xullo, entre as 17 e as 20 horas, en Caldas de Reis e continuará os vindeiros meses, entre outros concellos, na Estrada, Silleda, Vilagarcía de Arousa, Poio, Mondariz, O Porriño e Tui.