A presidenta da Deputación e o alcalde de Nigrán asinan o convenio para a futura biblioteca da vila ao abeiro do Plan de reequilibrio territorial
Carmela Silva: "É a inversión máis importante deste concello. Este tipo de proxectos son os que cambian o mundo"
A presidenta da Deputación de Pontevedra, Carmela Silva, e o alcalde de Nigrán, Juan González, asinaron esta mañá o convenio o abeiro do Plan de reequilibrio territorial da institución provincial para a construción da nova biblioteca da vila do Val Miñor.
Carmela Silva subliñou a importancia da sinatura deste convenio porque este tipo de infraestruturas son para "promover a cultura, a educación e mellorar o futuro" das veciñas e veciños da localidade do Val Miñor. A presidenta recalcou mostrarse "moi satisfeita" por asinar este tipo de convenios porque "todo o que sexa promover a cultura é moi importante porque nos permite cambiar o mundo e dotarnos de instrumentos para promover a igualdade de oportunidades entre todas e todos".
A presidenta recordou que o Plan de reequilibrio territorial se planificou por parte da Deputación ao ser consciente das carencias en moitos concellos de menos de vinte mil habitantes. "As veciñas e veciños da provincia poden, así, contar con infraestruturas culturais, deportivas ou de calquera tipo independentemente de onde vivan".
Silva considerou a nova biblioteca de Nigrán como o investimento máis importante deste concello "e vai ser unha realidade antes de xuño de 2019". "Este tipo de investimentos son os que máis me gusta que fagan os concellos", subliñou a presidenta.
Pola súa parte, o alcalde de Nigrán, Juan González, cualificou esta sinatura "como un momento moi importante. Vainos permitir contar cun espazo cultural no centro de Nigrán para o futuro".
O proxecto do edificio para a nova biblioteca ten un orzamento de 1.849.525 euros, dos que a Deputación de Pontevedra achegará 1.479.620 euros e o concello 369.905 euros.
O Plan de reequilibrio territorial contempla 25 concellos da provincia de menos de 20.000 habitantes, que recibirán 15 millóns de euros en subvencións da institución provincial para desenvolver un proxecto singular en cada termo municipal, que foi proposto por cada concello con criterios obxectivos, transparentes e claros que garantan unha lixeira compensación polo reparto de subvencións por parte de anteriores corporacións provinciais.
