A Deputación pecha o programa "Degusta Europa" no mercado do Progreso en Vigo
Resaltar os nosos produtos, recuperar a imaxe dos mercados e promover o traballo das escolas de hostalaría foron os obxectivos da iniciativa
O Mercado do Progreso de Vigo acolleu hoxe a última xornada do programa "Degusta Europa", impulsado pola Deputación de Pontevedra dentro de distintos actos para conmemorar o Día de Europa. "Con esta iniciativa transmitimos que nesta grande Europa somos moi plurais e somos moi capaces, con produtos das Rías Baixas, de poder elaborar multitude de pratos de calquera país", manifestou a presidenta Carmela Silva na súa visita ao Mercado do Progreso.
En concreto, hoxe en Vigo o menú foi o seguinte: sopa de melón con Oporto texturizado, xoubas fritidas con tempura de millo, xarda lañada con brotes tenros, risotto de mexillóns con tella de queixo parmesano e hamburguesas de porco con queixo gruyere. Trátase dos cinco pratos que alumnos e alumnas do Centro Manuel Antonio prepararon no propio mercado, onde previamente mercaron os produtos para a súa elaboración.
Ao igual que no Mercado do Progreso, "Degusta Europa" pasou, durante as dúas últimas semanas, por outros mercados da provincia, por Caldas de Reis, Pontevedra, Cambados, Bueu e A Guarda. A presidenta da Deputación destacou que o programa cumpriu con grande éxito o seu triplo obxectivo: resaltar a calidade dos nosos produtos e da nosa gastronomía, recuperar a imaxe dos nosos mercados e dar a coñecer o bo facer do alumnado das escolas de hostalaría.
Hoxe en Vigo foron mozos e mozas do Centro Manuel Antonio quen se encargaron de mercar os produtos e logo cociñalos, e outros días foron do centro Carlos Oroza de Pontevedra. Nos seis mercados onde estivo "Degusta Europa" prepararon en total preto de 6.000 tapas que puido degustar toda a cidadanía que se achegou. Tras o éxito das distintas convocatorias, e tal e como anunciou hoxe Carmela Silva, dende a Deputación prevese manter este tipo de iniciativas.
