A Deputación destina a Meis unha nova achega do Plan Concellos 2019 por preto de 50.000 euros
Con este investimento, o Goberno de Carmela Silva financiará a mellora e ampliación de camiños municipais en Talide, Mouxán e Muíño de Arriba
O deputado de Cooperación, Carlos Font, informou hoxe da aprobación, mediante unha Resolución presidencial, dun novo investimento a Meis ao abeiro da Liña 1 do Plan Concellos 2019 da Deputación de Pontevedra por un total de 48.309,08 euros. Trátase dunha axuda que se destinará á mellora e ampliación de diversos camiños municipais nos lugares de Talide, Mouxán e Muíño de Arriba. Este ano o Goberno de Carmela Silva pon á disposición de Meis a través do Plan Concellos 2019 un total de 493.833,62 euros, o que supón un 3,18 % máis que no exercicio anterior.
Ademais das achegas correspondentes á Liña 1, que son este ano de 341.769,99 euros, o Concello de Meis tamén ten á súa disposición polo Plan Concellos 2019 un total de 44.098,45 euros na Liña 2 de amortizacións e débedas. Así mesmo, outros 107.965,18 euros da Liña 3 de emprego cos que o Concello pode financiar a contratación de 9 traballadoras e traballadores para o concello.
Neste novo ano 2019, no total da provincia, a Deputación de Pontevedra pon á disposición dos 59 municipios ao través do Plan Concellos case 43 millóns e medio de euros, o que supón un 3,3 % máis que no exercicio do 2018.
