Meis pecha o Plan Concellos 2018 cunha nova achega da Deputación de Pontevedra de 251.000 euros
Este último investimento servirá para financiar a rehabilitación de edificacións da casa reitoral para o Centro Social de San Martiño
O deputado de Cooperación, Carlos Font, anunciou hoxe que o este venres, en Xunta de Goberno, a Deputación de Pontevedra aprobará unha nova achega do Plan Concellos para Meis, destinada á rehabilitación de edificacións da casa reitoral para Centro Social de San Martiño de Meis. Cun importe total de 251.982,50 euros, esta obra forma parte da liña 1 de Investimentos coa que, ademais, a vila do Salnés pecha o Plan Concellos da Deputación deste ano 2018.
Esta última actuación servirá para financiar a restauración e rehabilitación dunha edificación que comparte parcela coa casa parroquial, sobre a que non se actúa, e entre as que existe un patio. Vaise construír unha edificación lixeira, a dúas augas igual que as edificacións estremeiras, que cubra o patio de acceso, cunha pel completa en paredes e cuberta resolta en vidro. A cuberta levará un baruto de malla metálica e reixas de aireación para protexer do sol, pero permitindo ver e manter a luz do patio aberto e non competindo coas outras edificacións.
O volume vidrado do patio estará dedicado a sala multiusos e conectado á edificación a restaurar en muros de pedra, a través dos ocos orixinais. Constará de tres salas, dúas de uso libre e unha para aseos. É un espazo que responde ás necesidades relacionais da veciñanza, facendo público un espazo característico do lugar, rehabilitando edificacións con memoria e integrando novas construcións acordes que contribúen á mellora do conxunto. Restauraranse de forma tradicional os muros da construción existente, mediante acuñado de pedras de similares características, e executarase un novo volume contemporáneo que dialogue coa arquitectura tradicional.
Ademais deste investimento, a Deputación financiou este ano en Meis, a través da liña 1 do Plan Concellos, obras de reforma e adecuación da Praza de España do Mosteiro, actuacións para a rede de saneamento e reposición de firmes nos lugares de Brea, Seixo e Pedras, así como melloras na rede de saneamento e reposición de firmes no lugar de Muíño de Arriba. No caso da liña 3 de Emprego, Meis puido financiar a contratación de 9 traballadores, cunha achega económica de 105.417 euros. A través da liña 2, Meis recibiu 45.393,34 euros para amortización de débeda con entidades financeiras.
