37 novos obradoiros do programa "Conectadas 2017" chegan esta semana a 18 concellos da provincia
Máis de 630 mulleres se beneficiarán esta semana da iniciativa de Igualdade, que busca potenciar a participación e promoción das mulleres e mellorar a súa formación básica
A Deputación de Pontevedra pon en marcha esta semana 37 novas accións formativas dentro do programa "Conectadas 2017", promovido polo Servizo de Igualdade da institución provincial, para 18 concellos da provincia de Pontevedra e dos que se beneficiarán un total de 631 mulleres destas localidades. Os obradoiros, que están dirixidos a potenciar a participación e promoción das mulleres e a mellorar a súa formación básica, se realizarán nos concellos de Barro, Covelo, A Estrada, Fornelos de Montes, A Guarda, Lalín, Marín, Mos, Nigrán, Ponteareas, Pontecesures, Pontevedra, Redondela, Rodeiro, Salceda de Caselas, Silleda, Soutomaior e Vigo.
Este fin de semana comezaron as primeiras accións formativas nos concellos de Mos e Ponteareas. Así, 15 veciñas da "Asociación Casa Santa María de la Esperanza Esclavas de la Virgen Dolorosa" de Mos recibirán formación sobre sendeirismo e outras 15 da "Asociación Cultural Recreativa y Deportiva San Martín de Moreira" de Ponteareas sobre reciclaxe e ambiente.
O luns, 4 de setembro, iniciaranse oito accións formativas nos concellos da Estrada, Lalín, Marín, Ponteareas e Silleda. A "Asociación de Mujeres Rurales Consumidoras y Culturales de Codeseda" da Estrada acollerá un obradoiro sobre risoterapia no que participarán 15 mulleres. Pola súa banda, en Silleda terá lugar unha acción formativa sobre zumba na que participarán 17 mulleres da "Asociación Veciñal e Cultural Cortegada" e en Lalín terán lugar cursos sobre ximnasia de mantemento ("Asociación de Mulleres en Igualdade da Xesta" e "ASPADEZA") e pilates ("Asociación Mulleres Palilleiras de Lalín") nos que participarán 48 mulleres do concello.
Tamén comezará o 4 de setembro o curso de percusión e canto tradicional no que participarán 22 mulleres da "Asociación Cultural Deportiva Gharaboto" de Marín, ao igual que o farán os cursos de edición de fotografía e conservación de alimentos no que participarán 30 mulleres da "Asociación de Persoas con Discapacidade das comarcas do Condado e A Paradanta" e do "Centro Cultural Xinzo" de Ponteareas respectivamente.
O martes, 5 de setembro, inícianse 11 accións formativas nos concellos de Covelo, Ponteareas, Pontecesures, Pontevedra, Salceda de Caselas e Vigo. Así, 15 mulleres da "Asociación Mujeres y Familias del ámbito rural Fragas do Tea" de Covelo recibirán formación sobre percusión e canto tradicional. Pola súa banda, no concello de Ponteareas terán lugar cursos sobre pilates e ioga no que participarán 45 mulleres das asociacións "Casa Cultural Antorcha", "Asociación de veciños San Gregorio de Guillade" e "Asociación Cultural de Fontenla A Ascensión".
Tamén comezará o 5 de setembro cursos de percusión e canto tradicional no que participarán 15 mulleres da "Asociación de Amas de Casa e Cultural A Barcarola" de Pontecesures. No caso de Pontevedra, o concello acollerá un curso de risoterapia (Asociación de Mulleres Veciñais de O Castelo de Pontesampaio) no que participarán 15 mulleres e de arte floral (Asociación Rural Mulleres Estribela Lourizán) no que se formarán 18 persoas.
Pola súa banda, a "Agrupación Cultural Xunco" de Salceda de Caselas acollerá un obradoiro de zumba para 18 mulleres e en Vigo organizaranse accións formativas de traballos en tea, coiro, madeira e outros materiais ("Asociación de Veciños Nosa Terra de Alcabre"), cestería ("Asociación de Vecinos del Barrio de la Feria de Cabral") e arte floral ("Asociación de veciños Monte da Mina de Castrelos"), nos que participarán 49 mulleres.
O mércores, 6 de setembro, comezarán 8 cursos nos concellos de Lalín, A Guarda, Mos, Nigrán, Pontevedra, Redondela, Rodeiro e Vigo. Así, 17 mulleres da "Asociación de amas de casa Laxeiro" de Lalín recibirán formación sobre pilates; 15 persoas da "Asociación Érguete de Prevención das drogodependencias e de educación e promoción da saúde no Baixo Miño" da Guarda asistirán a un curso sobre musicoterapia; 15 mulleres da "Asociación de veciños de Petelos" de Mos recibirán formación sobre traballos en tea, coiro, madeira e outros materiais; 22 persoas da "Asociación de Vecinos La Canoesa de la Parroquia de Camos" en Nigrán asistirán a un curso tamén sobre traballos en tea, coiro, madeira e outros materiais; 15 mulleres da "Asociación cultural A Queimada" recibirán formación sobre costura creativa; 12 persoas da "Asociación Mulleres Rurais Sementeira" de Redondela asistirán a unha acción formativa sobre pintura; 19 mulleres da "Asociación de Mulleres Rurais Virxe do Faro" de Rodeiro se iniciarán na costura e 20 persoas de "FEAFES Galicia" se formarán en cociña e na elaboración dun menú diario.
O xoves, 7 de setembro, comezarán 5 obradoiros nos concellos de Redondela, Soutomaior, Ponteareas e Vigo. Así, 17 mulleres da "Asociación de veciños de Chapela" de Redondela participarán nunha acción formativa de ximnasia de mantemento; 19 persoas da "Asociación de Mulleres Rurais Anduriña de Arcade" en Soutomaior nun obradoiro de arte floral e outras 16 do mesmo concello pero da "Asociación de Veciños de Alxán" se formarán en edición de fotografía; 19 persoas da "Asociación de Vecinos La Comunidad de Pias" en Soutomaior asistirán a un curso de cestería e 18 mulleres da "Asociación Veciñal de Consumidores e Usuarios e Cultural Emilio Crespo" de Vigo nun obradoiro de tapas, petiscos e canapés.
O venres, 8 de setembro, darán comezo outras tres accións formativas nos concellos de Barro, A Estrada e Fornelos de Montes. Así, 25 mulleres da "Asociación Peñaflor" de Barro asistirán a un obradoiro de cestería, 19 persoas da "Asociación de Mulleres Rurais A Purísima" da Estrada se formarán en intelixencia emocional e 19 mulleres da "Asociación de Mujeres Rurales Consumidoras y Culturales A Xuntanza" de Fornelos de Montes asistirán a unha acción formativa sobre cestería.
"Conectadas 2017" ten por finalidade mellorar a formación básica das mulleres para favorecer as súas relacións interpersoais e o intercambio de experiencias ademais de contribuír á mellora da súa empregabilidade e ao mantemento no mercado de traballo e reducir a súa brecha dixital mediante a formación nas novas tecnoloxías.
O programa está destinado ás asociacións, federacións e fundacións sen ánimo de lucro que teñan como obxectivo e ámbito de actuación a promoción das mulleres, que apoien o seu desenvolvemento e empoderamento, ao igual que o seu tecido asociativo e a paulatina consecución do obxectivo da igualdade entre mulleres e homes. Cada unha das asociacións beneficiarias desenvolve unha acción formativa, de 35 horas de duración, distribuídas entre oito bloques temáticos: "Muller emprende" (emprendemento), "Muller e cultura" (dedicado ás artes visuais), "Actualízate" (alfabetización dixital), "Coas túas mans" (traballos manuais), "Porque ti o fas" (xardinería e ornamentación floral), "Súmate ao cambio" (cociña, costura, coidados e dependencia, corresponsabilidade, reciclaxe, bricolaxe…), "Ponte en forma" (deportes) e "Coidados persoais".
A Deputación de Pontevedra destina a esta edición do "Conectadas 2017" un orzamento de 324.000 euros. O pasado ano máis de 5.000 mulleres se sumaron a estas accións formativas que teñen por obxectivo impulsar a igualdade real e garantir o acceso a todas as persoas da sociedade á participación nas distintas esferas e actividades.
