200 mulleres da provincia comezan esta semana accións formativas do programa "Conectadas"
Os obradoiros de igualdade da Deputación de Pontevedra desenvolveranse en oito concellos da provincia
O programa da Deputación de Pontevedra "Conectadas" 2019 continúa poñendo en marcha accións formativas dirixidas a apoderar as mulleres da provincia mediante a formación. Deste xeito, a próxima semana comezan doce accións nas que participarán un total de 199 mulleres pertencentes a asociacións de oito concellos pontevedreses.
Máis polo miúdo, 16 mulleres de Cambados participarán na acción formativa "Coidados Propios do teu Benestar: Exercicios Motivacionais", organizada pola Asociación de Veciños San Vicente. O curso comezará o vindeiro xoves 17 de outubro no Centro Cultural Manuel Mariño Castro, desenvolverase ata o 16 de xaneiro e terá lugar os xoves, de 20:00 a 22:30 horas.
En Moaña a Asociación de Familiares de Enfermos de Alzhéimer do Morrazo levará a cabo o obradoiro "Coidados Propios do teu Benestar: Exercicios Prácticos e Motivacionais", no que participarán 24 mulleres. Este curso terá lugar os luns e os mércores na sede da Asociación María Martín, de 19:00 a 20:30 horas, e desenvolverase desde o 16 de outubro ata o 8 de xaneiro.
En Nigrán 15 integrantes da Asociación A Camoesa comezan a acción formativa "Bricolaxe e Reparacións no Fogar" o mércores 16 de outubro, que terá lugar de 17:00 a 19:30 horas, no centro da Asociación Cultural de Camoesa ata o 29 de xaneiro.
No concello de Ponteareas comezan dous cursos de "Conectadas". O primeiro deles achegará a disciplina do ioga a 15 mulleres da Asociación Cultural Centro Cultural de Cillarga e terá lugar no devandito centro os luns, de 18:00 a 19:30 horas, e os mércores, de 16:30 a 18:00 horas, entre o 14 de outubro e o 13 de xaneiro. O segundo tratará a artesanía en coiro e nel participarán 15 mulleres da Asociación Mulleres do Rural do Tea de Ponteareas os martes, de 16:00 a 19:00 horas, desde o 15 de outubro ata o 14 de xaneiro no Centro Cultural Sportivo.
En Redondela a Asociación Española Contra o Cancro levará a cabo o curso "Intelixencia Emocional". Esta acción terá lugar os martes e xoves, de 19:30 a 21:00 horas, no Centro Multiusos da Xunqueira e durará desde o 15 de outubro ata o 2 de xaneiro.
En Vigo comezan dous obradoiros de artesanía en coiro. O primeiro deles terá lugar na sede da Asociación de Beade os xoves, de 17:00 a 19:00 horas, ata o 6 de febreiro e nel participarán 17 mulleres. O segundo desenvolverase na sede da Asociación de Veciños de Cabral os venres, de 17:30 a 20:30 horas, desde o 18 de outubro ata o 4 de xaneiro, e nel participarán 15 mulleres. O concello de Vigo tamén acollerá a acción "Iniciación ao patchwork", grazas á cal 16 persoas da Asociación Mulleres Rurais Eira familiarizaranse con esta técnica de costura no Centro Sociocultural de Bembrive os xoves, de 17:00 a 20:00 horas, desde o 17 de outubro ata o 2 de xaneiro.
En Vila de Cruces 18 integrantes da Asociación de Mulleres Rurais de Camanzo exercitaranse grazas á disciplina de pilates no Local Social da Tilleira os martes, de 21:00 a 22:00 horas, e os xoves, de 19:00 a 20:00 horas. Este curso comezará o 15 de outubro e levarase a cabo ata o 6 de febreiro. Pola súa banda, 15 compoñentes da Asociación de Mulleres Rurais de Cumeiro formaranse no obradoiro "Poda e Tarefas do Campo desde a Sustentabilidade", que terá lugar os xoves, de 20:00 a 23:00 horas, desde o 17 de outubro ata o 2 de xaneiro.
En Vilagarcía de Arousa 15 mulleres da Asociación Mulleres Rurais Xiabre participarán no curso "Bricolaxe e Reparacións no Fogar", que terá lugar na Casa da Cultura de Guillán os luns, de 16:30 a 18:30 horas, desde o 14 de outubro ata o 10 de febreiro.
"Conectadas" 2019 é un programa provincial que pon o acento na formación a través de cursos e obradoiros sobre distintas cuestións para apoderar as mulleres e dotalas das ferramentas necesarias para construír unha sociedade igualitaria. Ademais, esta iniciativa tamén busca favorecer as relacións interpersoais e o intercambio de experiencias e contribuír a mellorar a súa empregabilidade e o seu mantemento no mercado de traballo, así como reducir a fenda dixital. O programa está dirixido a asociacións, federacións e fundacións que traballan en prol da promoción das mulleres, o seu desenvolvemento, o apoderamento feminino e a consecución da igualdade entre mulleres e homes.