Máis de 6.200 mulleres comezan desde hoxe accións formativas do programa "Conectadas"
Os obradoiros de igualdade da Deputación de Pontevedra desenvolveranse en 25 concellos da provincia
A Deputación de Pontevedra continúa poñendo en marcha accións formativas dirixidas a apoderar as mulleres da provincia mediante a formación no marco do programa "Conectadas" 2019. Deste xeito, desde este martes, 6.240 mulleres pertencentes a asociacións de 26 concellos pontevedreses comezan 51 cursos. En liñas xerais, a través desta iniciativa da institución provincial, está previsto que participen 6.240 mulleres de 25 concellos da provincia.
Máis polo miúdo, Agolada acollerá desde o 5 de outubro ata o 28 de decembro un curso de Pintura no que participarán as mulleres da Asociación Amas de Casa Témporas. As participantes gozarán da actividade os sábados de 17:00 a 20:00 horas. No municipio de Cambados, a Asociación de Mulleres Rurais A Seca de Corbillón organizará un obradoiro de Horta Ecolóxica, que comezará o 3 de outubro e desenvolverase os xoves ata o 19 de decembro entre as 20:00 e as 23:00 horas.
Pola súa parte, Baiona contará con dous obradoiros. O primeiro deles chega da man da Asociación de Viudas Mercedes de la Escalera, e abordará a Risoterapia os mércores, desde mañá ata o 15 de xaneiro, entre as 17:00 e as 19:30 horas. O mesmo día comezará un curso sobre Cociña e Alimentación. Hábitos Saudables, que durará ata o 18 de decembro, de 17:00 a 20:00 horas, grazas á Asociación de Amas de Casa de Baiona.
No que respecta a Caldas de Reis, hoxe mesmo dará comezo un obradoiro de Pilates a cargo da Asociación pola Igualdade de Saiar, que durará ata o 7 de febreiro e se desenvolverá os martes e xoves entre as 20:15 e as 21:15 horas. A Asociación de Mujeres Rurales Santa Lucía de Arcos da Condesa tamén organiza un taller de Pilates neste concello, que terá lugar os luns e os venres do 4 de outubro ao 16 de decembro, entre as 19:00 e as 20:30 horas. Por outra banda, a Asociación Socio-Cultural A Saleta brindará a oportunidade de practicar Ximnasia de Mantemento os luns e os venres entre o 4 de outubro e o 3 de febreiro, de 20:30 a 21:30 horas.
A Asociación de Mulleres Escola Vella do Hío leva a Cangas un obradoiro de Risoterapia que comezará hoxe e rematará o 20 de decembro. O horario deste obradoiro é os martes de 18:30 a 20:00 horas e os venres de 19:00 a 20:30 horas. No mesmo concello, as mulleres que o desexen poderán afondar en Cociña e Alimentación. Hábitos Saudables os venres desde o 4 de outubro ata o 3 de xaneiro, entre as 17:00 e as 20:00 horas, grazas á Asociación de Mulleres Progresistas de Darbo.
Pola súa parte, en Catoira, a Asociación de Mulleres Rurais Ascuas de Abalo fará un obradoiro de Inciación ao Scrapbooking os sábados; as clases comezarán o 5 de outubro e rematarán o 14 de decembro e terán lugar entre as 17:00 e as 21:00 horas. No concello de Covelo, a Asociación Cultural Virxe da Luz levará a cabo un obradoiro de Risoterapia os venres a partir do 4 de outubro e ata o 16 de xaneiro entre as 17:00 e as 19:30 horas.
O concello da Estrada contará con varios obradoiros de "Conectadas". Hoxe mesmo comeza un de Taichí a cargo da Asociación de Mulleres Rurais Castro Valente, que terá lugar os martes ata o 4 de febreiro, entre as 20:00 e as 22:00 horas. Tamén hoxe dará comezo un obradoiro de Risoterapia da man da Asociación de Mulleres Rurais Santa Clara dos Ancorados, que se desenvolverá os martes e os xoves ata o 12 de decembro entre as 16:30 e as 18:00 horas. Este martes tamén empezará un obradoiro de Xardinería organizado pola Asociación de Consumidores y Amas de Casa de A Estrada que se impartirá os martes de 17:00 a 20:00 horas e que finalizará o 17 de decembro.
No mesmo concello comezará mañá un curso de Cociña e Alimentación. Hábitos Saudables, que se desenvolverá os mércores ata o 15 de xaneiro da man da Asociación Rural de Amas de Casa de Arnois entre as 20:00 ou as 20:30 horas ata as 22:30 ou as 23:00 horas. Tamén na Estrada, o 4 de outubro iniciarase un obradoiro de Pintura grazas á Asociación Cultural de Mulleres Rurais de San Xurxo de Vea, que terá lugar os venres ata o 26 de xaneiro entre as 20:00 e as 22:30 horas. O mesmo día tamén comezará un obradoiro de Intelixencia Emocional, que se desenvolverá ata o 3 de xaneiro os venres de 17:30 a 20:30 horas da man da Asociación Mulleres Rurais Avelina Valladares.
Pola súa parte, no concello de Lalín inícianse este mes catro obradoiros de Ximnasia de Mantemento. O primeiro chega coa Asociación Mulleres en Igualdade de Donramiro e impartirase desde hoxe ata o 23 de xaneiro os martes e xoves entre as 20:00 e as 21:00 horas. O segundo comezará o xoves, 3 de outubro, e desenvolverase ata o 27 de xaneiro os luns e os xoves entre as 18:00 e as 19:00 horas grazas á Asociación Mulleres en Igualdade de Bendoiro. O terceiro dará comezo o 4 de outubro, durará ata o 28 de febreiro e terá lugar os venres entre as 21:30 e as 23:00 horas por iniciativa da Asociación Mulleres en Igualdade de Rodís. O derradeiro destes obradoiros impartirase os sábados desde o 5 de outubro ata o 11 de xaneiro entre as 16:30 e as 19:00 horas grazas á Asociación Mulleres en Igualdade de Galegos.
En Lalín tamén haberá un obradoiro de Iniciación ao Scrapbooking os martes desde hoxe ata o 29 de xaneiro, entre as 21:00 e as 23:00 horas, organizado pola Asociación Mulleres en Igualdade de Prado. Ademais, o concello acollerá un obradoiro de Pilates grazas á Asociación de Mulleres de Barcia; a actividade comezará o 3 de outubro e desenvolverase todos os xoves ata o 27 de febreiro entre as 11:00 e as 12:30 horas.
No concello de Marín hoxe empezarán dous obradoiros que durarán ata o 12 de decembro e que se impartirán os martes e xoves entre as 19:00 e as 20:30 horas. O primeiro deles realizarase grazas á Asociación de Veciños Pardavila Parroquia de San Julián e tratará a Relaxación e Manexo do Estrés: Momentos en Calma. O segundo é un Obradoiro de Mindfulness, que chega por iniciativa da Asociación Cultural Santo Tomé de Piñeiro-Marín. Este concello do Morrazo tamén acollerá un taller de Artesanía en Coiro que se desenvolverá os xoves, do 3 de outubro ao 24 de xaneiro, entre as 18:00 e as 20:00 horas grazas á Asociación Española Contra el Cáncer de Marín.
Por outra banda, Mondariz contará cun curso de Ioga programado pola Asociación de Veciños Xabriña de Mondariz, que terá lugar os luns e os mércores desde mañá ata o 3 de febreiro entre as 20:00 e as 21:00 horas. En Mos, a Asociación Sociocultural Malvela promove un obradoiro de Coidados Propios do teu Benestar, Exercicios Prácticos e Motivacionais os martes desde hoxe ata o 4 de febreiro, entre as 17:00 e as 19:00 horas. No mesmo concello, a Asociación de Mulleres Rurais Val da Louriña propón un curso de Alfabetización Dixital II: Internet, Correo Electrónico, Manexo da Tableta, Teléfono Intelixente... entre hoxe e o 12 de xaneiro. O obradoiro desenvolverase os martes de 16:30 a 17:30 horas e os sábados de 12:00 a 13:30 horas.
A Asociación de Personas con Discapacidad de la Comarca do Condado y Paradanta levará ao concello de Ponteareas un obradoiro de Risoterapia que terá lugar os luns e os mércores desde mañá ata o 16 de decembro entre as 17:00 e as 18:30 horas. No que respecta ao concello de Pontevedra, impartiranse dous obradoiros de Pilates. O primeiro deles chega da man de Xuntos Asociación de Síndrome de Down; comezará hoxe mesmo e desenvolverase ata o 12 de decembro os martes e xoves entre as 17:30 e as 19:00 horas. O segundo realizarase, grazas á Asociación Cultural A Queimada, os xoves desde o 3 de outubro ata o 27 de febreiro entre as 21:30 e as 23:00 horas.
O concello de Salvaterra de Miño contará cun curso de Iniciación ao Scrapbooking promovido pola Asociación Veciñal Xerme Cabreira e que se impartirá os sábados entre as 17:00 e as 19:30 horas; iniciarase o 5 de outubro e rematará o 19 de xaneiro. En Sanxenxo, a Asociación de Mulleres Rurais e Consumidoras Santa Catalina de Portonovo levará a cabo un obradoiro de Conservación de Alimentos: Conservas Artesanais os mércores desde mañá ata o 18 de decembro entre as 16:30 e as 19:30 horas. "Conectadas" tamén chegará a Silleda cun obradoiro de Ximnasia de Mantemento realizado pola Asociación de Mulleres Rurais de Dornelas, que empezará mañá e se desenvolverá ata o 16 de decembro os luns e os mércores entre as 16:00 e as 17:30 horas.
En Soutomaior terá lugar un obradoiro de Iniciación á Costura a través da Asociación de Veciños de Alxán, que comezará o día 3 de outubro e se impartirá os xoves ata o 3 de xaneiro entre as 18:00 e as 20:30 horas. A Asociación de Veciños San Benito de Romariz levará ao mesmo concello un curso de Pilates os luns e os venres, desde o 4 de outubro ata o 19 de decembro, entre as 18:00 e as 19:30 horas. Por outra banda, a Asociación Amas de Casa, Consumidores e Usuarios de Tui levará a cabo, dentro do programa "Conectadas", un curso de Alfabetización Dixital II: Internet, Correo Electrónico, Manexo da Tableta, Teléfono Intelixente... no concello de Tui, que terá lugar os mércores desde mañá mesmo ata o 18 de decembro, entre as 16:30 e as 19:30 horas.
Pola súa parte, o concello de Vigo acollerá catro cursos de "Conectadas". A Asociación Española Contra el Cáncer achegaralles o Teatro ás mulleres que o desexen os mércores desde mañá ata o 18 de decembro entre as 10:00 e as 13:00 horas. Tamén se desenvolverá un curso de Alfabetización Dixital I: do Papel ao Ordenador organizado pola Asociación de Veciños O Freixo os mércores, desde mañá ata o 19 de febreiro, entre as 18:00 e as 19:30 horas. Ademais, o concello recibirá un obradoiro de Cociña e Alimentación. Hábitos Saudables da man da Asociación Veciñal Cultural e Recreativa San Mamede de Zamáns; o curso levarase a cabo os xoves do 3 de outubro ao 19 de decembro entre as 19:00 e as 22:00 horas. Por último, o concello vigués acollerá un curso de Bricolaxe e Reparacións no Fogar programado pola Asociación de Veciños A Nosa Terra de Alcabre, que comezará o 4 de outubro e rematará o 17 de xaneiro, cunha sesión semanal en horario de 17:00 a 19:30 horas.
No concello de Valga, a Asociación de Veciños, Cultural e Deportiva de Cordeiro realizará un obradoiro de Cociña e Alimentación. Hábitos Saudables os venres, desde o 4 de outubro ata o 4 de xaneiro, entre as 19:00 e as 22:00 horas. En Vilaboa, a Asociación Mujeres Rurales, Consumidores y Culturales Boa Vila impartirá un curso de Iniciación á Costura que se desenvolverá os mércores desde mañá ata o 18 de decembro entre as 16:00 e as 19:00 horas. O concello de Vilagarcía de Arousa contará cun obradoiro de Conservación de Alimentos, Conservas Artesanais promovido pola Asociación de Mulleres Rurais Fontecarmoa; será os mércores desde mañá ata o 18 de decembro entre as 19:00 e as 22:00 horas.
Pola súa parte, en Vila de Cruces, a Asociación Mulleres Rurais de Sabreixo achégalles ás mulleres un curso de Pilates que comezará mañá e rematará o 20 de febreiro; será os mércores entre as 21:00 e as 22:30 horas. A Asociación de Mulleres Rurais de Ínsua-Duxame-Portodemouros levará a cabo no mesmo concello un obradoiro de Artesanía en Coiro os venres desde o 4 de outubro ata o 4 de xaneiro entre as 15:30 e as 18:30 horas.
Por último, o concello de Vilanova de Arousa contará cun obradoiro de Ioga da man da Asociación de Mulleres Rurais As Aceñas de Baión, que empezará mañá e acabará o 28 de novembro e terá lugar os luns e os mércores entre as 20:00 e as 22:00 horas. A Asociación de Mulleres Rurais Lolita Trigo achegará ao concello un obradoiro de Cociña e Alimentación. Hábitos Saudables os mércores desde mañá ata o 18 de decembro entre as 19:30 e as 22:30 horas. No concello tamén se impartirán dous cursos de Pilates. O primeiro deles chegará da man da Asociación Mulleres Rurais O Mouriño os xoves, desde o 3 de outubro ata o 27 de febreiro, entre as 20:00 e as 21:30 horas. O segundo comezará o 4 de outubro, concluirá o 3 de xaneiro e desenvolverase os venres entre as 20:00 e as 22:00 horas grazas á Asociación de Mulleres Rurais e Amas de Casa Citania de Baión.
"Conectadas" 2019 é un programa provincial que pon o acento na formación e desenvolve cursos e obradoiros sobre distintas cuestións para apoderar as mulleres e dotalas das ferramentas necesarias para construír unha sociedade igualitaria. Ademais, esta iniciativa tamén busca favorecer as súas relacións interpersoais e o intercambio de experiencias e contribuír a mellorar a súa empregabilidade e o seu mantemento no mercado de traballo e reducir a fenda dixital. Este programa está dirixido a asociacións, federacións e fundacións sen ánimo de lucro que teñan como obxectivo e ámbito de actuación a promoción das mulleres, o seu desenvolvemento e actuación, o apoderamento feminino e a consecución da igualdade de mulleres e homes.