O Goberno de Carmela Silva aproba novas achegas ao abeiro do Plan Concellos 2017
Gondomar, Ponteareas, O Rosal, Salvaterra de Miño, Vilaboa e Cuntis reciben estas axudas destinadas ao financiamento de investimentos, gastos correntes e diversas actividades
A Xunta de Goberno da Deputación de Pontevedra aprobou hoxe destinar preto de dun millón de euros para levar a cabo a mellora do alumeado exterior e das vías municipais de cinco concellos da provincia de Pontevedra. Deste xeito, os concellos de Cerdedo-Cotobade, A Estrada, Forcarei, Salvaterra de Miño e Vilaboa son os beneficiarios dunhas achegas enmarcadas na liña 1, Investimentos, do Plan Concellos 2017 e que ascenden a unha cantidade total de 892.160,93 €. A presidenta da institución provincial, Carmela Silva, subliñou que "con esta nova relación levamos xa aprobados investimentos para os concellos da provincia por valor de 11.523.742,96 € da liña 1 do Plan Concellos, é dicir, o 44,75 % do total correspondente a esta liña, que este ano ascende a 25.750.000 €".
No caso de Salvaterra de Miño, esta vila recibe unha achega situada en 68.187,07 € con destino á pavimentación de pistas municipais en Alxén-Seganosa (que implicará a limpeza de marxes e cunetas nunha extensión de 494 metros e a instalación de 2.245 m2 de capa de rodamento), campo da Feira (para o que tamén se limparán as marxes e cunetas en 404 metros divididos en dous ramais, a instalación de 1.332 m2 de capa de rodamento, tubaxes para drenaxes e reforzo de formigón, entre outras accións) e en pista da Igrexa (cunha actuación en 382 metros e a instalación de 1730 m2 de capa de rodamento). Carmela Silva sinalou que Salvaterra de Miño xa recibiu o 53 % do que ten asignado este ano ao abeiro do Plan Concellos 2017, isto é, un investimento de preto de 380.000 euros.
No caso de Vilaboa, o concello recibe unha achega situada en 72.037,33 € para a realización de obras de pavimentación, reparación do firme e reasfaltado de varias pistas municipais situadas no núcleo de Acuña. Carmela Silva sinalou que Vilaboa xa recibiu o 37 % do que recibe en total este ano ao abeiro do Plan Concellos 2017, isto é, un investimento próximo aos 185.000 euros.
300.000 euros para oito concellos ao abeiro da liña 2 do Plan Concellos 2017
O Goberno provincial de Carmela Silva aprobou tamén hoxe outras axudas por valor de 290.703,65 €, ao abeiro da liña 2 do Plan Concellos 2017, que permitirán a oito localidades da provincia de Pontevedra levar a cabo amortizacións, pagamento de débedas e gasto corrente así como gastos derivados da realización de actividades culturais, deportivas ou sociais. En concreto, beneficiaranse destas achegas Cuntis, Gondomar, O Grove, Lalín, Ponteareas, Ribadumia, O Rosal e Vilagarcía de Arousa. Carmela Silva subliñou que "con esta relación levamos xa aprobados investimentos para os concellos da provincia por valor de máis de 3,2 millóns de euros da liña 2 do Plan Concellos". Isto representa, sinalou a presidenta provincial, "máis do 52 % do total correspondente a esta liña, que este ano ascende a 6.180.000 euros".
En concreto, Carmela Silva informou dos investimentos aprobados en Gondomar, Ponteareas e O Rosal, que ascenden a un total de 67.614,63 euros. En concreto, Gondomar recibe unha achega de 11.760 € para o financiamento da proba monográfica Real CEPPA Galicia, para o 400 aniversario do Conde de Gondomar, a Festa da Empanada e Tapas do Conde e a gravación dun vídeo de promoción de turismo. No caso de Ponteareas, 29.353,73 € para gasto corrente novo que permitirán ao concello realizar obras de sinalización e repintado nas rúas do casco urbano. Por último, 26.500 euros para O Rosal destinados á Mostra da Camelia, a festa popular do Pilar, a Feira do Viño e a Festa do Cabaqueiro.
A achega total que reciben os concellos de Gondomar, Ponteareas, O Rosal e Salvaterra de Miño esta semana ao abeiro do Plan Concellos 2017 ascende a 135.801,70 euros.
Carmela Silva informou do investimento aprobado en Cuntis, que recibe unha axuda situada en 11.680,60 euros destinados ao mantemento e o acondicionamento da EDAR de Meira e, ademais, para o programa "Cuntis deportivo" deste ano 2017.
A achega total que reciben os concellos de Cuntis e Vilaboa esta semana ao abeiro do Plan Concellos 2017 ascende a 83.717,93 euros.
