O Plan Concellos achega case 200.000 € a Ponteareas para obras de humanización no paseo matutino
O grao de execución neste municipio sitúase no 94,7%, que supón un investimento na vila ata agora de 1.052.946,21 €
A Deputación de Pontevedra, na súa Xunta de Goberno, vén de aprobar unha contía de 199.008,56 € para o Concello de Ponteareas, que se destinará a obras de humanización no Paseo Matutino. Trátase dunha achega enmarcada dentro da liña 1, de investimentos, do Plan Concellos 2016.
Ao abeiro desta mesma liña 1, o Plan Concellos xa achegou este ano para Ponteareas investimentos por un total de 496.911,14 €, con contías que se destinaron, entre outros fins, para a ampliación da rede de abastecemento de varios lugares, actuacións de saneamento, melloras na seguridade viaria ou obras de mellora na escola infantil e no conservatorio.
Na liña 2 investíronse 65.978,58 € para sufragar gastos correntes, así como outros 41.000 €, na liña 3, para o financiamento da Escola de Música, do Conservatorio, da Festa do Corpus Christi e das Festas de Setembro. Por último, o Plan Concellos levou 250.047,93 € en liña 4 para a contratación de 34 traballadoras e traballadores que desenvolven as súas actividades profesionais nos servizos municipais.
Polo de agora,o grao de execución do Plan Concellos 2016 en Ponteareas atópase no 94,7%, acadando un investimento ata o momento de 1.052.946 €.
