Vilanova de Arousa recibe preto de 100.000 euros do Plan Concellos 2017 para a adquisición de subministro e a urbanización da praza do parque
Cun investimento próximo aos 430.000 €, a institución provincial xa leva entregado o 58 % do importe total de Vilanova de Arousa dentro do Plan Concellos
O Goberno da Deputación de Pontevedra acaba de aprobar, a través de sendas resolucións presidenciais, tres novas achegas ao Concello de Vilanova de Arousa ao abeiro da liña 1 de Investimentos do Plan Concellos 2017 que ascenden a un importe total de 93.317,11 euros. Trátase, en primeiro lugar, de 59.505,86 € para a urbanización da praza do parque, 21.764,69 € para facer fronte á adquisición dun escenario modular e, por último, outros 12.046,76 € que permitirán á localidade do Salnés adquirir cadeiras que destinará á realización de eventos.
Ademais, anteriormente a Deputación de Pontevedra xa destinara a Vilanova de Arousa 74.422,55 € en liña 1 para o acondicionamento da ampliación dun centro de formación con novas tecnoloxías no pazo de Vista Real. Ademais, 103.764,83 € en liña 2 para gastos correntes e actividades como a actuación musical da Festa do Mexillón e do Berberecho e a Festa do Momo e, finalmente, outros 155.647,25 € para a contratación de 18 persoas que desempeñarán as súas funcións nos diversos servizos municipais da localidade, a través da liña 3 de Emprego do Plan.
Coa suma destas cinco novas achegas, a porcentaxe de adxudicación do Plan Concellos 2017 da Deputación de Pontevedra en Vilanova de Arousa sitúase neste momento no 57,8 %. Isto supón que o concello xa dispón de 427.151,94 € dun total de preto de 740.000 €.
