Vilanova de Arousa recibe 45.000 € do Plan Concellos para a realización de catro actuacións na vila
Xa se entregou o 70% do total destinado a Vilanova de Arousa dentro do Plan Concellos 2016, o que supón un investimento na vila de 383.497,88 €
A Deputación de Pontevedra vén de aprobar, a través de varias resolucións presidenciais, catro novas axudas ao concello arousán de Vilanova dentro da liña 1, investimentos, do Plan Concellos 2016. Estas achegas empregaranse para o subministro de xogos na zona verde de San Miguel de Deiro, cun importe de 4.912,60 €; a protección da pista de madeira do edificio multiusos municipal, ao que se destinan 12.779,35 €; o equipamento de son tamén para o edificio multiusos, cunha contía de 16.233,36 €; e por último, o subministro de casiñas de madeira infantís do Xardín Umbrío, por valor de 11.222,75 €. Entre as tres contías, o Plan Concellos achega a Vilanova un total de 45.148,06 €.
Estas achegas veñen sumarse a outras xa entregadas no que vai de ano a Vilanova ao abeiro do Plan Concellos. En concreto, na liña 1, ademais destas novas contías, tense aprobado investimentos por un total de 98.656,57 €. Na liña 2 -gastos correntes, amortización e pagamento de débedas- o Plan Concellos supuxo unha achega de 87.161,30 € para o pagamento a acredores de gasto corrente.
Así mesmo, dentro da liña 3 -actividades deportivas, culturais, musicais e medioambientais- investiuse un total de 21.790 para as Sonatas de Verán, o Campionato Infantil e Alevín de Piragüismo, a Festa do Momo, o 150 Aniversario de Valle Inclán e a Festa do Mexillón e o Berberecho. Por último, dende este plan provincial xa se lle deu tamén o visto bo a outros 130.741,95 € na liña 4 -plans de emprego- para a contratación de 22 traballadores e traballadoras municipais.
No que levamos de 2016, o Plan Concellos xa se executou no 70% do total destinado a Vilanova de Arousa, situando neste momento o investimento na vila en 383.497,88 €.
