Vilagarcía de Arousa da o pistoletazo de saída este xoves ao programa "Depo en marcha" 2019
Preto de 30 persoas da Asociación de Mulleres Rurais Os Borrizos de Cornazo inician o obradoiro sobre Plantas Medicinais, que se prolongará ata o vindeiro 4 de xullo
A Deputación de Pontevedra inicia este xoves no concello de Vilagarcía de Arousa o primeiro obradoiro de "Depo en marcha" 2019. En total serán 23 persoas da Asociación de Mulleres Rurais Os Borrizos de Cornazo as que participarán nun curso sobre Plantas Medicinais, que se prolongará ata o 4 de xullo. O obradoiro será impartido os xoves en horario de 17 a 20 horas.
O programa "Depo en marcha" 2019 espallará pola provincia de Pontevedra obradoiros, de 30 horas de duración, englobados en oito grandes áreas temáticas Traballando coas Mans, Entre Fogóns, Aprendendo da Natureza, Móvete, Activando Corpo e Mente, Enredando, Dálle Marcha e En Rede.
Os principais obxectivos deste programa son favorecer o envellecemento activo, optimizar as oportunidades de saúde, participación e seguridade, mellorar a calidade de vida das persoas maiores, establecer relacións sociais e favorecer a participación en actividades que melloren o seu estado anímico, así como potenciar movementos de participación e cooperación social, promover espazos de encontro e impulsar a independencia das e dos maiores para evitar o illamento e as situacións de soidade. Este ano, a empresa Xestión Cultural Aurea S. L. é a encargada de xestionar o programa, que conta cun orzamento de 156.000 euros.
