O programa da Deputación "Depo en Marcha 2019" inicia esta vindeira semana cinco novos obradoiros na provincia de Pontevedra
Preto de 80 persoas maiores participarán en distintos talleres nos municipios de As Neves, Ponteareas e Salceda de Caselas
Ao longo da vindeira semana un total de 79 persoas comezarán na provincia cinco novos obradoiros enmarcados no programa "Depo en Marcha 2019". Os talleres iniciaranse nos municipios de As Neves, Ponteareas e Salceda de Caselas.
Máis polo miúdo, en As Neves, a Asociación de Veciños de San Cibrán de Ribarteme comeza o martes 21 un curso de Cestería, no que van participar 16 persoas todos os martes, de 17:00 a 20:00 horas.
Por outra banda, en Ponteareas, a partir do venres 24, a Asociación de Maiores de Ponteareas organiza un taller de Internet, correo electrónico e manexo do móbil que terá lugar os venres de 09:30 a 11:30 horas, no mes de xullo será os martes e venres no mesmo horario. A esta actividade están inscritas 16 persoas. Tamén, a Asociación Cultural San Nicolás de Prado comeza o luns 20 o obradoiro Conservando a memoria, no que van a participar 17 persoas os luns e mércores, de 17:00 a 19:00 horas. Pola súa banda, a partir tamén do luns, Adapta-Asociación de Discapacitados do Condado e Paradanta organiza tamén o taller Conservando a memoria, no que están inscritas 15 persoas, e que terá lugar os luns e mércores , de 18:30 a 20:00 horas.
Por último, en Salceda de Caselas comeza o martes 21 un curso de Arte con Flores na Asociación de Veciños Carballeira-Picoña, no que van a participar 15 persoas todos os martes, de 19:00 a 21:00 horas.
O programa "Depo en Marcha 2019" espalla pola provincia de Pontevedra obradoiros, de 30 horas de duración, englobados en oito grandes áreas temáticas "Traballando coas mans", "Entre fogóns", "Aprendendo da natureza", "Móvete", "Activando corpo e mente", "Enredando", "Dálle marcha" e "En rede".
Os principais obxectivos deste programa son favorecer o envellecemento activo, optimizar as oportunidades de saúde, participación e seguridade, mellorar a calidade de vida das persoas maiores, establecer relacións sociais e favorecer a participación en actividades que melloren o seu estado anímico, así como potenciar movementos de participación e cooperación social, promover espazos de encontro e impulsar a independencia das e dos maiores para evitar o illamento e as situacións de soidade.
