Tonucci: "os nenos e as nenas debedes atrevervos a dicirlles aos políticos aquilo que pensades e eles deben ter en conta a vosa opinión"
O pedagogo italiano reuniuse hoxe con alcaldesas, alcaldes e representantes dos concellos adheridos á rede de cidades dos nenos e nenas no sur da provincia de Pontevedra
O pedagogo italiano Francesco Tonucci segue a percorrer Pontevedra da man da Deputación e, no día de hoxe, mantivo un xantar de traballo cos alcaldes, alcaldesas e representantes municipais dos concellos adheridos á rede de cidades das nenas e nenos no sur da provincia. A cita, organizada pola institución provincial no concello de Tomiño, contou coa presenza da propia alcaldesa de Tomiño e dos alcaldes da Guarda, Nigrán, Salceda de Caselas, Ponteareas e As Neves, ademais do concelleiro de Deportes de Arbo, que, xunto ao deputado de Mobilidade, Uxío Benítez, intercambiaron propostas e debateron sobre a necesidade de redeseñar as vilas para que sexan aproveitadas pola veciñanza en lugar de polos coches. Tamén se puxo sobre a mesa a proposta de que os políticos atendan as reclamacións das pequenas e pequenos das súas vilas.
Unha vez máis Tonucci insistiu en que a súa filosofía está centrada na infancia como paradigma, xa que é "evidente" que os espazos públicos deseñados pensando nela son válidos para o resto da cidadanía. "Dicir que un espazo público debe ser deseñado para as nenas e nenos non é máis que dicir que debe ser válido para calquera, porque na vida das e dos cativos tamén están as persoas adultas que os acompañan", subliñou ante o público. Así mesmo, o pedagogo animou as e os rexedores a ter valentía á hora de aplicar a súa filosofía e instou a ter como referente, "non a copiar", o traballo feito na cidade de Pontevedra.
Visitas
A xornada de hoxe comezou no concello de Ponteareas, onde Tonucci foi recibido polo alcalde e a concelleira de Educación na praza do Mercado. Desde alí percorreu o camiño cara o concello pasando pola Praza Maior, onde quedou sorprendido pola existencia de carteis contrarios á peonalización total do espazo promovida desde o goberno local. O propio Tonucci subliñou a necesidade de poñer en evidencia que os comercios que protestan por esa recuperación do espazo son unha minoría e instou a quen considera que foi unha decisión correcta –a maioría da veciñanza– a mostrar tamén a súa visión. "Seguro que as pequenas e pequenos estarían encantados de facer algún cartel dicindo «Máis nenos e menos coches»", apuntou.
Unha vez na casa consistorial de Ponteareas, acompañado de varias ducias de nenas e nenos, participou na apertura da exposición organizada polo concello sobre os plans de remodelación urbana que pretende realizar grazas aos fondos EDUSI que contan co asesoramento do departamento de Mobilidade da Deputación –dirixido por Uxío Benítez– para estudar a mobilidade da vila.
Posteriormente Tonucci trasladouse a Tomiño, onde, xunto á presidenta da Deputación, Carmela Silva, o deputado de Mobilidade, Uxío Benítez, e a corporación municipal, inaugurou as novas instalacións do salón de plenos. O investigador foi recibido por un cento de alumnas e alumnos dos diferentes colexios do municipio, que agradeceron a súa visita, e destapou unha placa conmemorativa.
Despois de escoitar as pequenas e pequenos o pedagogo manifestou sentirse emocionado por ter a honra de inaugurar xunto a eles o salón de plenos, o que cualificou de "símbolo". "Este é o lugar da democracia, a praza onde se toman as decisións. As e os políticos pregúntanvos se estades dispostos a axudar e eu vouvos dicir como podedes facelo: non tendo medo, atrevéndovos a dicir o que pensades. O que as nenas e nenos pensan hai quen di que non vale moito, pero é ao contrario", subliñou.
Neste sentido, Tonucci lembrou varios dereitos recollidos na Convención dos dereitos do neno da ONU (1989): o artigo doce, referido ao dereito das nenas e nenos a expresar as súas opinións cada vez que se toman decisións que lles afecten, e o artigo 31, que recolle o seu dereito ao xogo. "Non sei que decisións poden tomar as persoas adultas sen que lles afecten ás nenas e nenos: penso que afectan sempre, por iso as autoridades teñen que contar sempre coas súas opinións", finalizou.
Pola súa banda, a presidenta da Deputación asegurou, unha vez máis, o seu orgullo por seguir acompañando "o amigo Tonucci" no seu percorrido pola provincia e subliñou que "non hai mellor forma de inaugurar un salón de plenos que estando cheo de rapaces e rapazas, xa que alí é onde reside a soberanía popular".
