Preto de 250 persoas de 9 concellos da provincia súmanse aos obradoiros de "Depo en marcha"
A Deputación de Pontevedra permitirá ás persoas maiores da provincia adquirir coñecementos en informática e en musicoterapia
Os concellos de Cerdedo-Cotobade, Marín, Moaña, Ponteareas, Ponte Caldelas, Salceda de Caselas, Silleda, Tui e Vigo súmanse esta semana, desde o 18 ata o 23 de setembro, a unha nova entrega dos obradoiros do programa "Depo en marcha 2017" da Deputación de Pontevedra. Esta acción da institución provincial impartirá, ao longo deste exercicio, un total de 161 cursos para entidades de persoas maiores, xubiladas e pensionistas de 45 concellos da provincia de Pontevedra. Os obradoiros deste semana suman un total de preto de 250 novos e novas participantes.
As persoas beneficiarias dos concellos de Vigo e de Tui, un total de 23 pertencentes á Asociación de Persoas Xubiladas e Prexubiladas BBVA e 18 á Asociación Párkinson do Baixo Miño, respectivamente, desenvolverán o obradoiro "Risoterapia" os luns contando desde o 18 de setembro. Con horario de 17:00 a 19:00 horas, coñecerán os beneficios da risa no ámbito da saúde e para mellorar o estado anímico e o estado físico das persoas a través dela.
A partir do martes 19, outras tres asociacións de Vigo desenvolverán novos obradoiros, o primeiro deles para 15 persoas pertencentes á Asociación Veciñal de Beade sobre "Plantas medicinais", no que coñecerán e diferenciarán os tipos de plantas con capacidades terapéuticas, as ferramentas básicas para o desenvolvemento da actividade e as orixes destas técnicas e procesos, e a aplicar as técnicas de semente, coidado, recolección e tratamento das plantas medicinais. O horario será de 17:00 a 19:30 horas. 18 persoas da Asociación Veciñal Fonte do Galo desenvolverán o obradoiro de "Pandeireta e canto tradicional", os martes de 17:00 a 19:30 horas, para coñecer a música popular galega, adquirir competencias técnicas tanto en canto como en pandeireta, aprender cancións tradicionais e coñecer as diferentes tipoloxías de música tradicional. Ademais, outras 25 persoas da Asociación Galega San Francisco recibirán os martes e xoves de 11:30 a 13:30 horas o obradoiro "Risoterapia".
17 persoas da Asociación Veciñal e Cultural de Cortegada de Silleda participarán en "Ximnasia de mantemento" a partir do mércores 20, en horario de luns e mércores de 19:30 a 21:00 horas ata o vindeiro 23 de outubro e de 19:00 a 20:30 horas a partir desta data. A través desta acción, as persoas maiores adquirirán unha maior destreza na coordinación dinámica de movementos e do equilibrio, ao tempo que realizarán exercicios de quecemento muscular e articular e adquirirán tamén as destrezas necesarias para a relaxación física e psíquica.
O xoves, 17 persoas da Asociación de Persoas Xubiladas e Pensionistas Mogor, de Marín, comezarán o obradoiro "Conservando a memoria", no que aprenderán o funcionamento da memoria, adquirindo técnicas de adestramento para o desenvolvemento da mesma, reflexionando ademais sobre a relación entre unha boa memoria e unha dieta equilibrada.
O venres 22 será a quenda de tres novas accións: en Moaña, para 19 persoas da Asociación de Familiares de Persoas Enfermas de alzhéimer do Morrazo, un obradoiro de "Tapas e petiscos" no que adquirirán as destrezas para elaboralos, para a presentación e decoración dos produtos e tamén normas básicas de seguridade e hixiene alimentaria. Serán os venres de 16:00 a 18:30 horas. No concello de Salceda de Caselas, "Depo en marcha" chega a 18 persoas da Asociación de Persoas Xubiladas e Pensionistas de Salceda coa acción "Cociña galega", con coñecementos na selección de produtos, na creación de pratos e a súa presentación, coñecemento dos ingredientes da nosa gastronomía…, con horario de 16:00 a 20:00 horas. Ademais, en Vigo, 18 persoas da Asociación Veciñal San Pedro de Matamá comezarán a súa formación en "Manualidades variadas", en horario de 16:00 a 18:30 horas.
O sábado 23 comezarán outras tres accións nos seguintes concellos: en Cerdedo-Cotobade, para 16 persoas da Asociación de Persoas Prexubiladas, Xubiladas e Pensionistas de Tenorio sobre "Pandeireta e canto tradicional" (de 19:00 a 21:30 horas), en Ponte Caldelas "Conservando a memoria" para 17 persoas da Asociación Veciñal de Anceu (de 19:30 a 21:30 horas) e en Vigo para outras 17 persoas da Asociación Veciñal do Barrio da Feira, en Cabral, sobre "Arte con flores".
A Deputación de Pontevedra pon en marcha este programa de fomento do envellecemento activo a través de actividades encaixadas en diversas temáticas e que conta cun orzamento de 120.000 euros. Con "Depo en Marcha 2017", a institución provincial busca mellorar a calidade de vida das persoas maiores da provincia de Pontevedra, establecendo relacións sociais e favorecendo a participación en actividades que melloren o seu estado anímico, potenciando movementos de participación e cooperación social, promovendo espazos de encontro e tamén o intercambio de experiencias.
As 8 alternativas de obradoiros que se impartirán nesta ocasión serán "Traballando coas mans": arte con flores, cestería, elaboración de xabóns, iniciación ao encaixe de palillos, restauración de mobles e tapicería e traballos manuais; "Entre fogóns": cociña galega, conservas artesanais, licores caseiros, panadería e repostería e tapiñas e petiscos; "Aprendendo da natureza": plantas medicinais; "Móvete": pilates, ioga, ximnasia de mantemento e zumba; "Activando corpo e mente": conservando a memoria, musicoterapia, risoterapia e control e manexo da ansiedade e o estrés; "Enredando": xogos tradicionais e teatro; "Dálle marcha": bailes de salón, pandeireta e canto popular; e, por último, "En rede": Internet, correo electrónico e manexo do móbil, informática de iniciación e Informática avanzada.
As actividades terán lugar nun total de 45 concellos da provincia: Agolada, Arbo, Barro, Baiona, Bueu, Caldas de Reis, Cambados, Cangas, Cerdedo-Cotobade, Covelo, Cuntis, A Estrada, Forcarei, Fornelos de Montes, Gondomar, O Grove, A Guarda, A Illa de Arousa, Lalín, Marín, Meaño, Moaña, Moraña, Mondariz, Mos, Nigrán, Pazos de Borbén, Poio, Ponteareas, Ponte Caldelas, Pontevedra, O Porriño, Redondela, Ribadumia, O Rosal, Salceda de Caselas, Sanxenxo, Silleda, Soutomaior, Tomiño, Tui, Valga, Vigo, Vilagarcía de Arousa e Vilanova de Arousa.
