O programa da Deputación de Pontevedra "Mulleres en acción. Violencia zero" chega a Mos da man de Rosalía Fernández

A iniciativa da artista titulada "Libre é o meu corazón" contou coa participación directa do alumnado de primeiro de Bacharelato do IES

O Concello de Mos converteuse hoxe na sétima parada desta nova edición do programa "Mulleres en acción. Violencia zero", da Deputación de Pontevedra. A artista Rosalía Fernández levou a cabo unha performance poética co alumnado de primeiro de Bacharelato. As e os alumnos puxeron en escena poemas e relatos escritos pola propia artista e de Rosalía de Castro. A peza converteuse así nun acto de oposición á violencia de xénero e un enxalzamento das mulleres e da súa valentía intrínseca.

O acto contou coa presencia da deputada de Igualdade, Isaura Abelairas, acompañada das tamén deputadas Victoria Alonso, Noemí Outeda, Olga García, Ana Laura Iglesias, Iria Lamas e Raquel Giráldez, dando así un forte acento institucional feminino por parte da Deputación. Con elas asistiron tamén a alcaldesa de Mos, Nidia Arévalo, e a concelleira de Política Social, Sara Cebreiro.

Isaura Abelairas destacou que o programa Violencia zero é unha das pezas fundamentais da programación da área de Igualdade, creada polo Goberno da Deputación, que preside Carmela Silva, no ano 2015. "Ímonos de aquí coa sensación de que algo estamos a facer", destacou antes de recalcar que a esperanza de erradicar a lacra machista está nas novas xeracións. "Estamos moi cansas de ler tódolos días no xornal que asasinaron a outra muller", lamentou para, a continuación, animar ao alumnado a estar alerta ante actitudes temperás de control ou dominio. "Confío plenamente en vos", concluíu, apelando ademais a súa condición de docente.

Nidia Arévalo agradeceu á Deputación a posta en marcha deste programa e o seu paso por Mos. Púxoo como exemplo de colaboración entre administracións e, finalmente, destacou que tanto en Mos como no resto dos concellos da provincia hai, agora mesmo, vítimas da violencia de xénero que están a sufrir.

Rosalía Fernández é licenciada en Filoloxía e doutora en Didáctica das Linguas e da Expresión Dramática pola Universidade de Santiago de Compostela. Da súa tese deriva o ensaio Aulas sen paredes, premiado na II Gala do Libro Galego. Como escritora tamén publicou poesía, con títulos como En clave de sol ou Ningún amante sabe conducir, e un libro de relatos curtos titulado Bonus track.

"Mulleres en acción. Violencia zero" ten por obxectivo darlle visibilidade á loita contra as violencias machistas, así como dar a coñecer o labor de novas artistas que están a traballar a prol da igualdade. Este ano volve reunir a 25 artistas especializadas en modalidades como a pintura, a música, a danza, o teatro, a poesía, o graffiti ou a performance, vinculadas pola vontade de ofrecer na súa obra un firme discurso en favor da igualdade de xénero. Esta quinta edición novamente terá lugar en 25 concellos da provincia (Pontevedra, Vigo, Lalín, Ponteareas, A Cañiza, Forcarei, Crecente, Mos, Redondela, Cangas, Cerdedo-Cotobade, Tui, Mondariz, Pontecesures, Gondomar, O Grove, Marín, Vilagarcía de Arousa, Cambados, Sanxenxo, O Porriño, O Rosal, A Guarda, Meis e Moaña).