Aprobado o expediente de contratación do programa "Depo en marcha" 2019
A Xunta de Goberno acaba de autorizar ademais o gasto para esta iniciativa en 2019, que será de 156.000 euros, 36.000 euros máis que neste exercicio
A Deputación de Pontevedra, en Xunta de Goberno, aprobou o expediente de contratación para a adxudicación, mediante procedemento aberto, do servizo de xestión, desenvolvemento e execución do programa "Depo en marcha" 2019. Trátase dun programa que ten como obxectivo favorecer o envellecemento activo a través de obradoiros de actividades que actúan como espazos de encontro e de intercambio de experiencias, evitando así o illamento e as situacións de soidade das persoas maiores.
O Goberno provincial tamén aprobou os pregos de cláusulas económico-administrativas e de prescricións técnicas que rexerán o procedemento. Autorizouse ademais o gasto para esta iniciativa, que para 2019 será dun máximo de 156.000 euros. Son 36.000 euros máis que nesta edición de 2018, onde o investimento é de 120.000 euros. Con esta suba orzamentaria, desde a Deputación quérese incrementar o número de obradoiros a realizar, que serán inicialmente 130, pero poderán incrementarse dependendo do número de solicitudes presentadas.
O programa "Depo en marcha" diríxese a todas as entidades de maiores, pensionistas e xubilados da provincia, así como outras entidades que traballan no eido dos maiores. Os obradoiros a realizar en 2019 englobaranse en oito grandes áreas: "Traballando coas mans", "Entre fogóns", "Aprendendo da natureza", "Móvete", "Activando corpo e mente", "Enredando", "Dálle marcha" e "En rede".
