O Porriño recibirá este ano máis dun millón de euros do Plan Concellos, un 4 % máis de recursos que en 2016, un punto máis que a media provincial
O Plan da Deputación para 2017 achega unha media dun 3% máis de cartos aos concellos da provincia.
A Deputación de Pontevedra achegaralles este ano 2017 un 3,76 % máis de recursos ao Concello do Porriño no marco do Plan Concellos. Deste xeito, este municipio da comarca viguesa recibirá un total de 1.052.165,16 €, 38.161,80 euros máis que en 2016, ano no que xa tivo un 33,8 % de incremento con respecto a 2015 (o que se traduciu en 256.078,46 € máis). Á marxe do Plan Concellos, O Porriño recibirá este ano outras axudas e subvencións, enmarcadas nas diferentes áreas de actividade da Deputación de Pontevedra, ás que o Concello poderá concorrer.
Investimentos totais durante 2016
Durante 2016 a Deputación de Pontevedra destinou ao Porriño un total de 1.579.977,73 euros, dos cales 1.014.003,36 € correspondéronse co Plan Concellos 2016. Ademais, a institución provincial investiu 121.269,52 € en mobilidade, 99.819,19 € en cohesión social e xuventude, 34.270,50 € en cultura e lingua, 153.166,08 € para o fomento do emprego, 63.947 € para o impulso do deporte e outros 4.889,35 € para a igualdade entre mulleres e homes.
En materia de cooperación O Porriño tamén recibiu 30.221,93 €, no marco do PICEI 2016, para a mellora das instalacións do campo de fútbol do Carballo U. D. Atios-O Porriño.
No que se refire ao Plan Concellos, a través da liña 1 investíronse 746.814,09 € para a rede de saneamento en Alvarín, o acondicionamento dun local para o arquivo municipal, o saneamento na Pereira e O Contrasto (Torneiros), a renovación de instalacións de iluminación exterior, a mellora das instalacións deportivas do C. F. Atios e o colector de saneamento no lugar da Igrexa (Pontellas). Ademais, 38.000 €, na liña 3, destinaranse á Escola Municipal de Música e ao apoio e reforzo escolar a menores en desvantaxe; e, grazas á liña 4,creáronse 30 postos de traballo nos servizos municipais, cun investimento de 228.150,60 €.
Á marxe do Plan Concellos 2016, O Porriño recibiu 34.270,50 € para o fomento da cultura e a lingua, con 23 actuacións do Pontegal e do Ano Castelao, así como as axudas á rehabilitación e sinalización do patrimonio histórico-cultural e as axudas á dinamización lingüística. Tamén se destinaron 99.819,19 € para cohesión social e xuventude, ben a través dos servizos sociais comunitarios e especializados, as axudas básicas de emerxencia e o servizo de teleasistencia domiciliaria (con 31 usuarios e usuarias) ou ben mediante os programas "En ruta coa Depo", "Depotermal", "Tecendo lazos", "Depo en marcha", "DepoRúarte" e "Depo Aventura A Lanzada", no que participaron 37 nenas e nenos do concello.
Así mesmo, O Porriño recibiu 63.947 € para o deporte federado de base, a Copa de Fútbol Deputación de Pontevedra e diversas actividades deportivas, así como 40.091,52 € para o fomento do emprego a través dos plans de práctica laboral, que permiten que catro persoas estean a desenvolver a súa primeira experiencia laboral no Concello do Porriño. Tamén se achegaron 4.889,35 € para o fomento da igualdade, a través do programa "Conectadas 2016" e as axudas aos concellos de menos de 20.000 habitantes para o fomento da igualdade de oportunidades entre mulleres e homes e a prevención da violencia machista; e outros 121.269,52 € en materia de mobilidade, en concreto para o Plan Móvese e as obras de sinalización horizontal nas vías provinciais.
