O Goberno de Carmela Silva dálle luz verde á mellora da seguridade viaria na EP-5105 en Covelo entre as parroquias de Maceira e A Graña
A actuación, que se desenvolverá nun tramo de 1,1 quilómetros, adxudicouse por un importe de 226.240,11 euros e ten un prazo de execución de seis meses
A Xunta de Goberno da Deputación aprobou a adxudicación do contrato de execución para mellorar a seguridade viaria e a senda peonil na EP-5105 Maceira-A Graña, no concello de Covelo, desde o P.Q. 10+250 ata o 11+350. En concreto, a actuación foi adxudicada por un importe de 226.240,11 euros (IVE incluído).
A actuación, que ten un prazo de execución de seis meses, desenvolverase nun tramo de 1,1 quilómetros da estrada. Ademais da mellora do firme da EP-5105, as obras consistirán na execución dunha senda peonil, dunha anchura prevista de 2,5 metros, paralela á plataforma existente e separada da calzada principal a través de marcas viarias continuas e reflectores.
No tramo final da senda tamén se prevé a execución dunha plataforma de convivencia con prioridade peonil, onde non hai anchura suficiente para habilitar a senda. Ademais, contémplase a execución do reforzo do firme na plataforma para o paso dos vehículos, así como a renovación da sinalización horizontal e vertical e a instalación de elementos de calmado de tráfico.
