O goberno de Carmela Silva aproba unha achega de preto de 80.000 € ao abeiro do "Plan Concellos" para a pavimentación da rúa Recamán de Marín
A achega enmárcase na cuarta concesión aprobada da liña 1, investimentos, a través da cal xa se distribuíu preto dun millón de euros nos concellos da provincia
A Xunta de Goberno da Deputación de Pontevedra acaba de aprobar a cuarta concesión de subvencións ao abeiro da liña 1 de investimentos do "Plan Concellos 2017". Entre os concellos beneficiarios destas novas achegas atópase o de Marín, que recibirá preto de 80.000 € por parte da institución provincial nunha liña de axudas destinadas ao financiamento de diversos investimentos escollidos polos propios gobernos municipais dos concellos de menos de 50.000 habitantes da provincia de Pontevedra.
Deste xeito, Carmela Silva anunciou que Marín "recibirá un investimento de 77.282,68 euros para a pavimentación da rúa Recamán". Dentro deste proxecto está previsto que se realicen traballos de fresado dos pavimentos, a realización dunha nova capa de rodamento de cinco centímetros, a limpeza e a reparación das beirarrúas, a instalación de sinalización horizontal e vertical, a realización dun novo paso de peóns e o traslado do semáforo.
Carmela Silva sinalou que se trata "unha vez máis de axudas que lles permiten aos concellos facer fronte aos servizos básicos, aos dereitos, equipamentos e estruturas municipais, cousa que non fai ningunha outra administración nos concellos de menos de 20.000 habitantes da nosa provincia".
A presidenta provincial sinalou que o investimento aprobado ata o momento en liña 1 se sitúa próximo ao millón de euros, e matizou que "esta liña sempre vai máis lenta porque os concellos teñen que presentar e redactar os seus proxectos, pero a partir de agora comezarán a entrar de forma continuada moitos proxectos para os que este ano dispoñemos dun investimento de 25.750.000 euros fronte aos 25.000.000 do exercicio anterior", isto é, un incremento de 750.000 €. Esta cantidade dedicada á liña 1 do "Plan Concellos 2017" supón o 62,5% do conxunto do Plan, que está dotado dun investimento de 41,2 millóns de euros, o 3% máis que no caso do "Plan Concellos 2016".
