Mondariz pecha o Plan Concellos da Deputación de Pontevedra con dúas últimas achegas por 27.000 euros

Con estes investimentos o Goberno de Carmela Silva financiará a adquisición dunha rozadoira de brazo, outra de asento e unha rozadoira profesional de man

A Deputación de Pontevedra acaba de aprobar, mediante sendas resolucións presidenciais, dúas axudas ao concello de Mondariz por un valor de 27.079,8 euros para a adquisición dunha rozadoira de brazo, unha rozadoira de asento e outra rozadoira profesional de man. Así, con estes investimentos Mondariz pecha o Plan Concellos deste ano, ao través do cal o Goberno provincial destinoulle 877.689,41 euros, un
74,58 % máis que en 2017.

Este ano, a través da liña 1 do Plan Concellos, Mondariz tamén contou co financiamento de infraestruturas nos campos municipais de fútbol da Lagoa, por importe de 105.992,49 euros; da reforma da planta baixa da casa do concello, por 24.649,14 euros; da mellora de camiños municipais en Cernadela (Riofrio) e nos lugares do Costal e O Coto (Sabaxáns), por 10.188,15 euros; do equipamento e mellora das instalacións do auditorio do centro social da vila, por 36.673,53 euros; das obras de reparación 2.ª fase da escola de Redo de Vilar, por 44.039,97 euros; da mellora da accesibilidade e acondicionamento parcial da antiga escola Pe do Muíño para Centro de Formación Municipal (Fase II), por 6.700,47 euros; da execución dunha pasarela cuberta no interior dun recinto escolar, por 30.415,49 euros; da mellora de camiños en Frades, Sabaxáns, Mouriscados e Vilasobroso, por 29.932,90 euros; da mellora e pavimentación do camiño de Pontevedra, por 29.614,75 euros; da adquisición dunha minicargadora e cullerón varredor, por 26.500 euros; tamén da adquisición de equipamentos informáticos, por 23.589,52 euros; do equipamento e mellora das instalacións da policía local e protección civil, por 9.351,38 euros; e da adquisición de equipamento para escola de música, axuda no fogar e pavillón municipal, por 8.754,58 euros.

Ademais, a Deputación de Pontevedra adxudicou 35.747,74 euros no que corresponde á liña 2 e tamén outros 115.822,52 euros que foron destinados á financiación da contratación de 21 traballadoras e traballadores que están a desempeñar funcións no concello, dentro da liña 3 de Emprego.

Este ano a Deputación de Pontevedra puxo a disposición de Mondariz, a través do Plan Concellos, un total de 877.689,41 euros, o que supón un 74,58 % máis que no exercicio anterior.