Máis de 200.000 € do Plan Concellos 2017 para investimentos en Barro e Mos
Estas achegas son as primeiras concesións da liña 1, investimentos, do Plan Concellos 2017 a través do cal a Deputación de Pontevedra achegará aos municipios da provincia máis de 25,7 millóns de €
A Xunta de Goberno da institución provincial vén de aprobar as primeiras concesións, no marco da liña 1 do "Plan Concellos 2017", para que Barro e Mos poidan levar a cabo investimentos nos seus núcleos de poboación por valor de máis de 204.356,3 €. En concreto, Barro e Mos son os primeiros concellos en recibir achegas desta liña do plan que, durante o 2017, distribuirá entre os municipios un total de 25.750.000 €, o 62,5% do total do Plan, para a realización de investimentos.
A Presidenta da Deputación de Pontevedra, Carmela Silva sinalou que "grazas a esta liña 1 do Plan Concellos as vilas e pobos da nosa provincia poden levar a cabo investimentos que permiten dotar de infraestruturas, en moitas ocasións básicas, para garantir a calidade de vida das veciñas e veciños dos concellos da nosa provincia".
A través desta primeira aprobación de investimentos no marco da liña 1 do Plan Concellos, o concello de Barro recibirá 73.487,18 € para o financiamento da ampliación de viarios en Fonte de Curro. Pola súa banda, a Deputación de Pontevedra achegará a Mos 130.869,12 € para a estabilización dun terraplén na vía Xeneroso Domínguez.
