A Deputación asina un convenio con Fornelos de Montes para a instalación dunha fonte
A fonte de pedra, que será construída pola Escola de Cantería, será colocada na praza da Igrexa de Fornelos de Montes
A Deputación de Pontevedra vén de asinar co concello de Fornelos de Montes un convenio para a realización dunha fonte de pedra, valorada en 11.204,60 €, que será colocada na praza da Igrexa do municipio.
A deputada de Emprego e delegada da Escola de Cantería, Montse Magallanes, e o alcalde de Fornelos de Montes, Emiliano Lage, coincidiron en sinalar a importancia de poñer en valor o traballo do alumnado da Escola, que será quen leve a cabo os traballos de elaboración e instalación da fonte. Este traballo, ademais, vai reverter a favor das administracións públicas ou asociacións sen ánimo de lucro e contribuír ao embelecemento dos concellos da provincia.
A fonte será construída en pedra, con estanque e catro saídas de auga, e levará os dous escudos de Fornelos de Montes, un na parte frontal e outro na parte posterior. Terá tres metros de diámetro de estanque e 2,50 m de alto.
