Finalizada a rehabilitación do firme en medio quilómetro na estrada EP-2804 entre Fornelos e Ventín
O deputado de Mobilidade Uxío Benítez explica que a actuación encaixa na Estratexia de Mobilidade 3.0 co obxectivo de mellorar a seguranza viaria
O departamento de Mobilidade da Deputación de Pontevedra acaba de rematar os traballos de rehabilitación estrutural do firme dun treito de medio quilómetro na estrada provincial EP-2804 entre Fornelos e Ventín, no termo municipal de Fornelos de Montes.
A actuación executouse entre os puntos quilométricos 0+000 e 0+500 e consistiu en fresar parte do firme anterior, aplicar unha rega de adherencia, a correspondente capa de rodaxe e unha nova capa de material antiescorregadizo. Finalmente, rematouse a obra coa sinalización horizontal. Previamente tamén se realizara unha limpeza e reperfilado de cunetas e marxes coa roza dos noiros de ata catro metros de altura. O orzamento para facer estes traballos ascendeu a 28.246,09 euros, e executáronse en tres semanas, un prazo menor do inicialmente previsto (un mes).
Segundo explicou o deputado de Mobilidade, Uxío Benítez, a rehabilitación estrutural do firme na estrada provincial de Fornelos executouse co obxectivo de mellorar a seguranza viaria na zona, xa que se detectaran diferentes deficiencias na capa de rodaxe. O nacionalista destacou que o correcto mantemento das estradas provinciais é un dos piares da Estratexia de Mobilidade 3.0 que está a desenvolver o actual goberno da Deputación de Pontevedra, fundamentado na sustentabilidade, inclusión e seguridade, a través de melloras de conservación, vialidade e sinalización, así como actuacións de calmado de tráfico e convivencia.
As melloras e actuacións de mantemento dos firmes das estradas provinciais realizaranse a partir de 2018 a través dun novo contrato marco que permitirá axilizar as licitacións. En virtude dese acordo marco, a provincia dividirase en cinco zonas, nas que cinco empresas diferentes serán as responsables da execución de todas e cada unha das obras necesarias en cada área. O lote no que está o mantemento viario do concello de Fornelos inclúe tamén os municipios de Ponte Caldelas, A Lama, Pazos de Borbén, Redondela, Soutomaior, Ponteareas, Salvaterra de Miño, As Neves, Mondariz, Mondariz-Balneario, A Cañiza, Covelo, Arbo e Crecente, cun investimento de 711.896,06 euros.
