Escolares de Moaña aprenden que é a compostaxe co 'Xogo da miñoca'
A Deputación e o CEIDA realizaron na Escola de Educación Infantil unha xornada de obradoiros
Rapaces e rapazas da Escola de Educación Infantil Verducedo de Moaña participaron esta semana nunha xornada de obradoiros da man da Deputación. Os 33 pequenos e pequenas participaron no ‘Xogo da miñoca', no que coñeceron ao colémbolo, un verme que se ten convertido na mascota educativa do Plan Revitaliza da Deputación.
A xornada para aprender en que consiste a compostaxe estivo protagonizada por unha variación do xogo da oca na que as nenas e nenos, formando equipos, tiveron que pasar unha serie de probas e preguntas (sobre que tipo de elementos se poden botar na composteira, como se produce o proceso, ou que pasos hai que dar para chegar a ter un bo compost). Polo medio da proba houbo que ‘salvar' algúns contratempos como, por exemplo, atrasar casiñas ou pasar xogadas sen tirar cada vez que se caía na icona de accións negativas para a compostaxe, como son a aportación de pintura ou medicamentos á composteira, esquecer pechar a tapa desta…
A vindeira semana está prevista a posta en marcha dun pequeno centro de compostaxe no centro, no que os pequenos poderán coñecer de primeira man todos os pasos necesarios para converter o lixo orgánico en compost.
Este programa educativo que están a levar adiante a Deputación realízase xunto co CEIDA mediante un convenio dentro do Plan Revitaliza, e vai dirixido ao alumnado de Primaria e Secundaria dos centros próximos aos composteiros comunitarios implantados pola institución provincial. Os colexios, ademais das actividades que se desenvolveron en Verducedo, poden solicitar tamén outro tipo de obradoiros tales como 'Quen vive aí?' (sobre os vermes do composteiro), ‘Poñendo en marcha o composteiro' ou ‘'A voltas coa compostaxe' dirixidos a outras idades do alumnado, así como unha exposición itinerante.
A Deputación de Pontevedra, co Plan Revitaliza, está a facer unha aposta clara pola colaboración cos concellos na posta en marcha de plantas de tratamento biolóxico e polo impulso da compostaxe, tanto a escala individual como comunitaria e comarcal.
