Carmela Silva asiste en Vigo ao inicio dos cursos de español para persoas inmigrantes da Deputación de Pontevedra
A presidenta destacou a importancia desta iniciativa de inclusión social, que se pon en marcha por primeira vez, e da que se beneficiarán un total de 60 persoas
A presidenta da Deputación de Pontevedra, acompañada pola deputada de Cohesión Social e Xuventude, Digna Rivas, asistiu hoxe na sede da administración provincial en Vigo ao inicio dos cursos de español para persoas inmigrantes promovidos pola institución, grazas aos que un total de 60 alumnos e alumnas de case unha ducia de países prepararanse de xeito gratuíto para superar o exame do Diploma de Español como Lingua Estranxeira (DELLE A2), requisito imprescindible para adquirir a nacionalidade española.
Segundo sinalou Carmela Silva, o exame DELE é unha proba que esixe unha preparación previa, "e isto ten un custo económico asociado, que para algunhas destas persoas é difícil afrontar economicamente" polo que esta iniciativa "facilita que todas estas persoas, en situación administrativa regular e que residen entre nós, teñan a posibilidade de acceder á preparación do DELE en igualdade de condicións e con todos os seus dereitos".
As clases desenvolveranse entre os meses de setembro e decembro e o alumnado dividirase en catro grupos cun máximo de 15 estudantes por quenda. Os tres primeiros grupos comezaron as clases hoxe, un no Pazo provincial de Pontevedra, e outros dous un de mañá e un de tarde, na sede da institución provincial en Vigo. A clases da cuarta quenda, tamén na sede de Vigo, impartiranse desde o 27 de novembro ata o 20 de decembro.
As prazas ofertadas completáronse en apenas en un mes e o alumnado do curso está composto por persoas procedentes de 11 países entre os que están Marrocos, Brasil, Nixeria, Ghana, Costa de Marfil, Senegal, Serra Leona, Romanía, Reino Unido, Rusia e Ucraína, cunha formación previa básica en lingua española.
Os cursos, que serán integramente subvencionados pola Deputación incluíndo tamén as taxas de matrícula do DELE, serán impartidos por persoal docente do Centro de Linguas da Fundación Universidade de Vigo. En xeral, mediante esta formación prepararase ás persoas inmigrante para poder realizar probas de compresión de lectura, de comprensión auditiva, de expresión e interacción escrita e oral.
