Cangas recibe 230.000 € do Plan Concellos para a renovación e mellora de servizos de rúas e barrios
O grao de adxudicación do Plan Concellos en Cangas sitúase preto do 88%, o que supón un investimento na vila de 894.407,83 €
A Xunta de Goberno da Deputación de Pontevedra vén de aprobar dúas achegas ao concello de Cangas dentro da liña 1, investimentos, do Plan Concellos, por valor de 229.903,67 €: en primeiro lugar, 98.362,90 € destinados á renovación urbana das rúas Hospital, Lúa e Lirio e, ademais, outros 131.540,77 € para a elaboración dun proxecto de pavimentación e mellora de servizos no barrio de Outeiro, no casco vello da vila.
Esta axuda súmase ás outorgadas anteriormente no Plan Concellos: 520.899,38 € na liña 1 para a reparación e acondicionamento de camiños de titularidade municipal na contorna do río Bouzós e a contención e a recollida de pluviais no lugar de Ourelo, para a adquisición de luminarias no paseo Castelao, Eugenio Sequeiros e Montero Ríos e a adquisición de vehículos para limpeza e recollida de lixo. Ademais 134.901,97 euros –liña 2– para gastos correntes, 38.050 € na liña 3 para nove actuacións culturais (un proxecto orquestral, proxectos educativos, camiños escolares, actividades medioambientais, Musicanfas 2016, o Correlingua, o 17º Salón do Cómic, o III Festival de Danza e Música Tradicional de Cangas "Aturuxos ao son da ría" e a programación cultural do auditorio municipal en canto a "Rede Teatros" de abril) e, por último, 200.556,48 € destinados á contratación de 34 traballadoras e traballadores que desenvolven as súas profesións nos servizos municipais.
No que levamos de 2016, o grao de adxudicación do Plan Concellos 2016 destinado a Cangas sitúase no 87,7% do total, o que supón que neste momento o investimento na vila acada a cifra de 894.407,83 €.
