Bueu recibe preto de 40.000 euros do Plan Concellos 2017 con destino a mellorar os cemiterios municipais
A Deputación de Pontevedra leva entregado o 95 % do total destinado a Bueu dentro do plan, cun investimento situado en arredor de 765.000 euros
O Goberno de Carmela Silva acaba de aprobar, a través dunha Resolución presidencial, unha nova axuda ao Concello de Bueu no marco do Plan Concellos 2017, dentro da súa liña 1 de Investimentos. Nesta ocasión, a localidade do Morrazo recibe unha achega valorada en 38.967,51 euros a través da cal poderá financiar a realización de obras de mellora dos seus cemiterios municipais situados nos núcleos de Bueu e de Cela.
Ao abeiro do Plan Concellos 2017, anteriormente a institución provincial xa destinara a Bueu 305.756,51 € para o acondicionamento e mellora da praza Massó e a posta en marcha de áreas de xogos infantís adaptadas e inclusivas así como áreas biosaudables e un área de skate park na vila, 238.297,91 € para a pavimentación de camiños públicos (estas dúas accións na liña 1) e, por último, outros 94.157,35 € para a contratación de 15 persoas que desempeñarán as súas funcións nos diversos servizos municipais da localidade, a través da liña 3 de emprego do plan.
Coa suma desta nova achega, Bueu xa ten recibido da Deputación de Pontevedra o 95,1 % do total do investimento que lle corresponde dentro do Plan Concellos 2017, isto é, 763.796,91 € dun total de máis de 800.000 €.
