A Deputación de Pontevedra aproba nunha semana axudas para programas de igualdade e loita contra a violencia machista por máis de 340.000 euros
A Xunta de Goberno aprobou as subvencións para que as entidades sociais da provincia poidan desenvolver estas iniciativas
Tan só unha semana despois de aprobar as bases de subvencións dirixidas a concellos da provincia para impulsar programas de igualdade e loita contra a violencia de xénero, a Xunta de Goberno da Deputación de Pontevedra acaba de subscribir agora as bases das axudas a entidades sociais da provincia, por importe de 108.000 euros. Deste xeito, en poucos días, o Goberno provincial deu visto bo a destinar 340.000 euros para impulsar este ano programas de igualdade e rachar coa lacra das violencias machistas na provincia de Pontevedra.
En concreto, a través dos 108.000 euros que aprobou a institución provincial, as entidades sociais poden destinar recursos a proxectos e actividades de sensibilización, formación e prevención da violencia de xénero; iniciativas de atención integral para vítimas de violencia de xénero, fillas e fillos e persoas dependentes; programas destinados a mulleres con singulares dificultades; proxectos que favorezan e fomenten a igualdade; actividades para a mellora da formación e orientación para o emprendemento e a inserción laboral das mulleres; iniciativas encamiñadas a crear redes e servizos de apoio ou ben campañas de difusión e sensibilización á cidadanía en materia de igualdade.
No 2020 estas axudas beneficiaron a 26 entidades sociais dos concellos de Cambados, Cangas, Lalín, Marín, Mos, Pontevedra, Silleda, Tui, Vigo e Vilagarcía de Arousa que puideron desenvolver programas de información e apoio ás vítimas de violencia de xénero, actividades formativas e de atención integral, proxectos de empoderamento dirixidos a mulleres con diversidade funcional e inmigrantes, así como conferencias, obradoiros de mindfulness ou mesmo cursos de autodefensa persoal.