As "Barbies intervidas" chegan este luns á praza de Abastos do Concello de Mondariz coa exposición "Rompe. Xoga en igualdade"
A presidenta Carmela Silva inaugurará a rompedora mostra de igualdade, acompañada do alcalde, Xoan Carlos Montes, e das creadoras da exposición
A presidenta da Deputación de Pontevedra, Carmela Silva, acompañada pola deputada provincial Isaura Abelairas, polo alcalde de Mondariz, Xoán Carlos Montes, e de dúas das artistas creadoras da mostra, Isabel Blanco e Irene Silva, inaugurará este luns, ás 12:30 horas na praza de Abastos da vila, a exposición "Rompe. Xoga en igualdade". Esta mostra de igualdade foi inaugurada en Pontevedra con motivo do 8 de marzo e tras o seu paso polo Pazo provincial comezou o seu percorrido en Vigo e Ponteareas para chegar agora a Mondariz.
A exposición está protagonizada polas famosas bonecas "Barbie", que foron intervidas para denunciar de forma impáctante e rompedora a desigualdade entre homes e mulleres. Consta de 18 paneis cheos de poesía visual que teñen por obxectivo cambiar o mundo e golpear as conciencias. Así, as protagonistas dos paneis amosan as situacións de desigualdade, violencia e discriminación que viven as mulleres desde nenas, recalcando a importancia do xogo para a educación, transmisión de valores e formación de nenas e nenos.
A boneca seleccionada para a mostra foi a "Barbie" por tratarse da máis famosa da historia e coa que, a diario, xogan milleiros de nenas no mundo. Pero que, ao mesmo tempo, presenta a unha muller obxecto que transmite valores sexistas que se están a reproducir tanto nos xogos como nas condutas das nenas e nenos. Desta maneira, as artistas creadoras da mostra interviñeron as bonecas para romper e reivindicar a igualdade entre mulleres e homes, así como concienciar á sociedade para que se poña fin á discriminación e á violencia machista. Trátase dunha mostra cun importante valor simbólico e, por iso, diante de cada peza haberá un martelo co fin de trasladar a idea de romper con esta situación.
A exposición poderá visitarse na praza de Abastos de Mondariz ata o 29 de xullo e estará aberta ao público de luns a domingo en horario de 9 horas a 14 horas.
