Arbo recibe 80.000 euros para mellorar a pavimentación de diversos camiños ao abeiro do Plan Concellos 2017 da Deputación de Pontevedra

A institución provincial leva entregado o 89 % do total destinado a Arbo dentro do Plan, un investimento superior aos 375.000 euros

A Deputación de Pontevedra aprobou, a través de senllas resolucións presidenciais, dous novos investimentos para o concello de Arbo ao abeiro da liña 1 do Plan Concellos 2017. Deste xeito, Arbo dedicará 41.019,13 euros á realización de melloras na pavimentación de camiños dos núcleos de Laguallo e Devesa, por unha banda, e do Posto e Rasela, pola outra, esta vez con outros 36.010,80 €. Estas dúas axudas, polo tanto, suman un total de 77.029,93 euros.

Anteriormente, Arbo xa recibira outros 180.060,83 euros, tamén na liña 1, con destino ao financiamento do acondicionamento das piscinas municipais do concello, dunha obra de mellora da estrada que une os lugares do Couto e Paravedra e da ampliación de parte das vías municipais da localidade, o acondicionamento dunha mina de auga e para o subministro e montaxe da iluminación públicada rúa Antonio Tovar. Ademais, destináronse 37.088,66 € da liña 2 para gastos correntes, investimentos informáticos e mobiliario para o servizo de recollida de residuos e 81.889,20 € da liña 3 para a contratación de 15 persoas nos distintos servizos municipais.

Con esta nova achega Arbo aprobou xa o 88,8 % do total de investimento que recibe dentro do Plan Concellos 2017, isto é, 376.068,62 € dun total de preto de 424.000 euros.