Arbo recibe 20.000 euros para realizar melloras na rúa Antonio Tovar ao abeiro do Plan Concellos 2017 da Deputación de Pontevedra
A institución provincial leva entregado o 71 % do total destinado a Arbo dentro do plan, un investimento próximo aos 300.000 euros
A Deputación de Pontevedra acaba de aprobar, a través dunha Resolución presidencial, un novo investimento para o Concello de Arbo ao abeiro da liña 1 do Plan Concellos 2017. A través dos 19.321,63 € que recibe da institución provincial, a localidade poderá financiar unha actuación de subministro e montaxe do alumeado da rúa Antonio Tovar.
Anteriormente, Arbo xa recibira outros 160.739,20 €, tamén na liña 1, con destino ao financiamento do acondicionamento das piscinas municipais do concello, dunha obra de mellora da estrada que une os lugares do Couto e Paravedra, ampliar parte das vías municipais da localidade e acondicionar unha mina de auga. Ademais, 37.088,66 € na liña 2 para gastos correntes, investimentos informáticos e mobiliario para o servizo de recollida de residuos e 81.889,20 € na liña 3 para a contratación de 15 persoas nos distintos servizos municipais desta localidade.
Grazas a esta nova achega, a vila de Arbo xa leva aprobado o 70,6 % do total de investimento que recibe dentro do Plan Concellos 2017, isto é, 299.038,69 € dun total de preto de 424.000 euros.
