O alumnado do IES Ramón Aller visita o Viveiro de Lalín nunha nova actividade de dinamización
Este martes 4 de febreiro as e os estudantes do IES Ramón Aller coñecerán en profundidade o funcionamento do Viveiro de Empresas da Deputación
Este martes 4 de febreiro, a partir das 12.00 h, o Viveiro de Empresas de Lalín recibirá a visita do alumnado do IES Ramón Aller. As e os estudantes farán unha visita guiada e poderán coñecer en profundidade o funcionamento e os beneficios desta iniciativa que a Deputación de Pontevedra leva a cabo.
Ademais de percorrer as instalacións, o alumnado do centro lalinense recibirá dúas charlas durante a visita, tituladas "Viveiros de Empresa de Deputación de Pontevedra e o seu papel no desenvolvemento económico da provincia" e "A experiencia de ser viveirista". Este último relatorio correrá a cargo de Leticia del Valle, de NousEduka, quen tamén será a encargada de impartir unha dinámica de grupo sobre o emprendemento.
A visita encádrase entre as actividades que a Deputación de Pontevedra está a desenvolver co fin de promocionar e dinamizar este espazo de emprendemento que ten na capital de Deza.
O Viveiro de Empresas de Lalín conta con tres naves industriais cunha superficie variable de entre 131,20 e 142,70 m2, cinco oficinas (catro delas de 16,10 m2 e unha de 18,10 m2), un espazo polivalente como sala de xuntanzas e un espazo de coworking con 16 postos.
