A Deputación de Pontevedra impulsa tres novas actividades para a promoción e dinamización do Viveiro de Empresas de Lalín
Entre as iniciativas destacan o Viveiro 2020, LuscoFusco Networking II e o microespazo radiofónico EmprendeViveiro
A Deputación de Pontevedra pon en marcha entre novembro e decembro tres novas actividades no Viveiro de Empresas de Lalín, co fin de seguir a promocionar e dinamizar este espazo. En concreto, a sesión de traballo Viveiro 2020 terá lugar o 28 de novembro de 10 a 13 horas; a xuntanza LuscoFusco Networking II chega o 11 de decembro, ás 19:30 horas; e, por último, o microespazo radiofónico EmprendeViveiro terá lugar o 27 de novembro e o 11 de decembro.
Neste eido, o mércores 27 de novembro, EmprendeViveiro estará protagonizado por Leticia Valle Ortín, que ocupa a oficina 4 do viveiro de Lalín, e que falará do que supón para ela ter un espazo no viveiro e da súa labor profesional no ámbito da formación, o coaching e o desenvolvemento persoal. Por outra banda, o 11 de decembro neste mesmo microespazo radiofónico, Eliana Bouzas, de ADL Viveiros, fará un resumo dos diferentes programas que se levan a cabo.
Viveiro 2020, que terá lugar o xoves 28 de novembro, consiste nunha sesión de traballo de 3 horas, guiada e baseada na aplicación de dinámicas creativas. Nesta actividade participa persoal técnico da Deputación de Pontevedra, concellos, asociacións empresarias, a ADL Viveiros e representantes das e dos viveiristas de cara a traballar nas liñas de actuación para o ano 2020, analizando a realidade actual e o contexto no que se atopa o viveiro de empresas. Esta iniciativa buscar marcar o inicio dunha colaboración a longo prazo que reverta nun índice de ocupación estable e continua do Viveiro de Lalín, ao tempo que promove e da resposta ás demandas e necesidades do tecido económico e social do concello e a súa comarca.
A quenda de LuscoFusco Networking II chega o 11 de decembro. Deste xeito, durante a xornada farase balance actual do Plan para a promoción e dinamización do viveiro a anunciaranse as liñas de actuación para o vindeiro ano. Pola súa banda, tamén se van presentar as propostas ás necesidades detectadas no territorio a través do laboratorio de emprendemento social PorcoLab. Ademais, as persoas participantes terán a ocasión de escoitar a charla inspiradora "Emprender no 2019. Novos modelos de negocio".
