A mostra integradora da Deputación, "Sorrisos transformadores", chega o martes a Vilaboa
A exposición, froito da colaboración da Deputación de Pontevedra con ARELAS, poderá visitarse no CPI Toural de Vilaboa ata o venres 15 de novembro
A Deputación de Pontevedra e a Asociación de Familias de Menores Trans* de Galicia (ARELAS) levan a Vilaboa a exposición "Sorrisos transformadores", o proxecto fotográfico para a visibilización do colectivo LGTBI. De feito, Cristina Palacios, presidenta de ARELAS, ofrecerá no marco desta mostra unha charla no salón de actos da Casa da Cultura de Riomaior. Nela afondará sobre a situación do colectivo LGTBI, aportará a súa experiencia persoal e responderá ás dúbidas e cuestións que poidan xurdir. A cita terá lugar o martes 5 de novembr, ás 11:00 horas. Pola súa banda, a exposición poderá visitarse no CPI Toural de Vilaboa desde o 5 ata o 15 de novembro, entre as 9:00 e as 14:00 horas.
"Sorrisos transformadores" é unha mostra itinerante que acaba de percorrer varios concellos da provincia de Pontevedra e tamén algún outro emprazamento fóra da provincia, coma Betanzos ou a Universidade de Santiago de Compostela. A exposición consta de 10 fotografías de Noemí Chantada nas que aparecen retratadas persoas alegres, orgullosas, que amosan unha parcela da súa vida que lles gusta. Cada fotografía está acompañada por un texto que reflicte unha frase ou unha idea sobre a protagonista ou sobre a seu entorno. Entre as persoas retratadas inclúense persoas de relevancia social, sexan ou non transexuais, pero si relacionadas coa realidade destas persoas pola súa profesión e que axudan á hora de transmitir a súa mensaxe, como son especialistas da educación, do dereito, da política ou da psicoloxía.
A finalidade de "Sorrisos transformadores" é a de, por unha banda, prever actitudes e comportamentos discriminatorios por orientación sexual ou identidade de xénero e, pola outra, combater o acoso escolar por estes dous motivos, favorecendo a visibilidade do alumnado LGTBI e a plena normalidade das orientacións sexuais e identidades de xénero.
